بڕيارا به‌لاڤكرنا 11 هزار پارچێن ئه‌ردى ده‌ركه‌فت
ئه‌ڤرۆ نيوز:
جڤاتا وه‌زيرێن هه‌رێما كوردستانێ بڕيار دا 11 هزار و 141 پارچێن ئه‌ردى ب سه‌ر كه‌سوكارێن شه‌هيد و ئه‌نفالكرى و زيندانيێن سياسى به‌لاڤ كه‌ت. وه‌زيرێ كاروبارێن شه‌هيد و ئه‌نفالكريان ژى ئه‌ڤ بابه‌ته پشت راستكر.
سه‌مير هه‌ورامى، سكرتێرێ قوباد ته‌له‌بانى جێگرێ سه‌رۆك وه‌زيرێن هه‌رێما كوردستانێ راگه‌هاند كو رۆژا چارشه‌مبى 21ى شوباتا 2018ێ قوباد ته‌له‌بانى ب سيفه‌تێ سه‌رۆك وه‌زيرێن هه‌رێما كوردستانێ ب وه‌كاله‌ت ئيمزا ل سه‌ر بڕيارا به‌لاڤكرنا 11 هزار و 141 پارچێن ئه‌ردى بۆ كه‌سوكارێن شه‌هيد و ئه‌نفالكرى و رزگاربوويێن به‌رمايكێن ئه‌نفالان و زيندانيێن سياسى كر.
ل دووڤ گۆتنا سه‌مير هه‌ورامى، پشتى ده‌ركه‌فتنا بڕيارێ وه‌زاره‌تا باژێرڤانى و گه‌شتوگۆزار دێ ده‌ست ب به‌لاڤكرنا پارچێن ئه‌ردى كه‌ت. به‌حس ل وێ چه‌ندێ ژى كر كو بڕيار دێ هه‌موو پارێزگه‌هێن كوردستانێ ڤه‌گريت و ئه‌رد ب وان كه‌سان هێته دان يێن هه‌تا نوكه مفادار نه‌بووين.
هه‌ڤده‌م مه‌حمود حاجى سالح، وه‌زيرێ كاروبارێن شه‌هيد و ئه‌نفالكريان د كۆنگره‌كێ رۆژنامه‌ڤانى دا هوورده‌كاريێن چاوانيا به‌لاڤكرنا ئه‌وان پارچێن ئه‌ردى راگه‌هاند و ئاشكه‌را كر كو ب گۆره‌ى بڕيارێ پێنج هزار و 69 پارچه بۆ رزگاربوويێن ئه‌نفالانه و سێ هزار و 398 ژى بۆ كه‌سوكارێن شه‌هيدێن سه‌نگه‌ر و دو هزار و 674 چاره ژى بۆ زيندانيێن سياسى هاتينه ته‌رخانكرن.
هه‌ر د وى كۆنگرێ رۆژنامه‌ڤانى دا وه‌زيرێ كاروبارێن شه‌هيد و ئه‌نفالكريان ئاماژه ب وێ چه‌ندێ ژى كر كو به‌رى نوكه فه‌رمانه‌كا دى هه‌بوو كو 10 هزار پارچێن دى يێن ئه‌ردى بهێنه به‌لاڤكرن.
