بڕیارە ئەڤرۆ ھژمارتنا دەنگان ب دەست ل دھۆکێ ب دووماھی بھێت
ئەڤرۆ نيوز:
ژێدەرەکی کو نەڤیا ناڤێ وی بھێتە دیارکرن بۆ رۆژناما ئەڤرۆ خویا کر، پرۆسا ھژمارتنا دەنگێن 107 سندۆقێن پارێزگەھا دھۆکێ ل ھۆلا کۆلیژا چاندنێ ھاتە ئەنجامدان و بڕیارە ئەڤرۆ 16-7-2018 ئەو پرۆسە ب دووماھی بھێت.
وی ژێدەری ئاشکرا ژی کر، ئەو 107 سندۆقێن دنگێن وان ھاتینە ھژمارتن یێن دەنگێن تایبەت، گشتی و ئاوارێن تۆمارکری بوون و گۆت: “197 سندۆقێن دی یێن دەنگێن ئاوارێن نەتۆمارکی نە و ھەر ئەڤرۆ جڤاتا دادوەران دێ بڕیارێ ل سەر وان دەت کا بھێنە ھژمارتن یان نە”.
ئاماژە ب وێ چەندێ ژی کر کو پرۆسا ھژمارتنا دەنگێن ھژمارەکا سندۆقێن پارێزگەھا دھۆکێ ل بن چاڤدێریا جڤاتا دادوەران یا بەغدا، نوونەرێن نەتەوێن ھەڤگرتی، رێکخستنێن نێڤدەولەتی و ئالیێن سیاسی دھێتە ئەنجامدان و گۆت: “بڕیارە ئەڤرۆ پرۆسە ب دووماھی بھێت و ل دووماھیا پرۆسێ ژی کۆنگرەکێ رۆژنامەڤانی ل دۆر ھەمان بابەت بھێتە ئەنجامدان و چەند پێزانین بۆ دەزگەھێن راگەھاندنێ بھێنە دیارکرن”.
