بڕیارە 700 رۆژنامەڤان پارچێن ئەردی وەرگرن
ئه‌ڤرۆ نيوز:
نەقیبێ سەندیکا رۆژنامەڤانێن ھەرێما کوردستانێ دیار کر کو بڕیارە 700 رۆژنامەڤان ژ وەرگرتنا پارچێن ئەردی مفادارببن و گۆت: “ب تنێ پەسەندا سەرۆکاتیا جڤاتا وەزیران مایە بۆ بەلاڤکرنا ئەردی ل سەر تەخا رۆژنامەڤانان”.
حاکم ئازاد حەمەدەمین، نەقیبێ سەندیکا رۆژنامەڤانێن کوردستانێ بۆ رۆژناما ئەڤرۆ ئاشکرا کر ژ بەر کو رۆژنامەڤانان چو وەزارەتێن دیاریکری نینن و پشکەکا رۆژنامەڤانان فەرمانبەرێن چو فەرمانگەھێن حوکمەتی نینن، لەوڕا سەندیکا رۆژنامەڤانان وەک ئەرکەک فۆڕمێن وەرگرتنا پارچێن ئەردی ژ وەزارەتا باژێڕڤانیێ وەرگرتینە و ب سەر ھەموو لق و نڤیسینگەھێن خوە بەلاڤکرینە و گۆت: “ل گورەی ئامارا بۆ مە ھاتی 700 رۆژنامەڤانان فۆڕم تژیکرینە بۆ وەرگرتنا پارچێن ئەردی و مە ژی ھەموو فۆڕم پێشکێشی وەزارەتا باژێڕڤانیێ کرینە داکو ئەرد ل سەر وان بھێتە بەلاڤکرن”.
ناڤھاتی ئاماژە دا وێ چەندێ کو وان دووڤچوون بۆ ئەردێ رۆژنامەڤانا کریە و وەزارەتا باژێڕڤانیێ گۆتیە وان کو ناڤێن رۆژنامەڤانان چووینە سەرۆکاتیا جڤاتا وەزیران و ھەر دەمێ رازیبوون ل سەر ھاتەکرن دێ پارچێن ئەردی ل سەر رۆژنامەڤان ھێنە بەلاڤکرن و گۆت: “داخوازێ ژ رۆژنامەڤانان دکەین فشارێ پێخنە سەر سەرۆکاتیا جڤاتا وەزیران داکو ب زووترین دەم ناڤێن وان بھێنە پەسەندکرن و ئەر ل سەر وان بھێتە بەلاڤکرن”.