بھایێ قنینێن غازێ دێ ھێتە كێمكرن
ئەڤرۆ نيوز:
ئەندامەکێ جڤاتا پارێزگەھا دھۆکێ دیار کر کو یێ بەرھەڤیان دکەن بۆ رێکخستنا بھایێن قنینێن غازێ ل سەرانسەری پارێزگەھا دھۆکێ و ئارمانج ژ ئەڤێ چەندێ کێمکرنا بھایێن قنینێن غازێ یە کو ل گەل تێکچوونا کاودانێن دارایی و ئابووری ب گونجن.
ئدریس ھەرکی ئەندامێ جڤاتا پارێزگەھا دھۆکێ بۆ رۆژناما ئەڤرۆ گۆت “روونشتنەک دێ ل سەر رێکخستنا غازێ ھێتەکرن، چونکی بھایێ غازێ نەیێ راوستیایە و ل ھەر جھەکی بھایەکە و دڤێت ئەڤە بھێتە ئێکلاکرن و ل گەل کاودانان بگونجیت، ھندەک جھان بتلێ غازێ ب نەە ھزارانە و ھندەک جھان ھەتا دوزادە ھزار دینارانە و گەلەک جاران ل چێبوونا قەیرانان ھەتا بیست و پێنج ھزار دیناران ژی چوویە.
ھەرکی زێدەتر ژی گۆت “دڤێت بھا بھێتە رێکخستن و ل گۆرەپانێ بھا بھێتە دیارکرن و دیسان ل دەمێ ئینانا بەر دەرگەھی ژی بھا بھێتە دیارکرن و نابیت ھەر جھەکی ب شێوەکی بیت، دیسان دێ کار کەین غاز ببیتە ململانێ و کی دێ کێمتر دەتە وەلاتیان”.
ھەروەسا ئەندامێ جڤاتا پارێزگەھا دھۆکێ گۆت “ئارمانجا سەرەکی ئەوە کو بتلێ غازێ ئەرزان بکەین و بھێتە خوارێ و ل ھەموو جھان ب وەکھەڤی بھێتە فرۆتن، دێ پەیوەیندی و روونشتن ل گەل کۆمپانیێن غازێ و لیژنا سوتەمەنیێ ل جڤاتێ ھەبن”.
