بۆچوونا تارق حه‌رب شاره‌زايێ قانوونا عيراقى ل سه‌ر سه‌ربه‌خۆيا كوردستانێ چ يه؟
ئه‌ڤرۆ نيوز:
شارەزایەکێ قانوونیێ عیراقی راگەھاند، پتریا لایەنێن سیاسی یێن عیراقێ یێن گەھشتینە وێ ئەنجامێ کو باشترە ھەرێما کوردستانێ ژ عیراقێ جودا ببیت و ببیتە وەلاتەکێ سەربخوە، ئەڤجا چ ب باوەری گەھشتە وێ ئەنجامێ، یان نە ، لێ دبێژن نابیت ئەڤ ناکۆکیێن بەغدا و ھەرێمێ ھەر د ڤێ رەوشێ دابن و پەیوەندیێن ھەردو لایەنان ب ڤی شێوەی دبەردەوام بن، لەوما نابێژم رازیبوون یان نەرازیبوون ل سەر پرسا جوودابوونێ یا ھەی، بەلکو نوکە رێگری نەکرن ل سەر وێ پرسیا سەربخوەیا کوردستانێ ژ عیراقێ، ل بەغدا یا ھەی.
تارق حەرب شارەزایێ قانوونی یێ عیراقی بۆ رۆژناما (ئەڤرۆ) گۆت” پشتی قۆناغا داعشێ و دەرکرنا وێ ژ مووسلێ، پێدڤیە بەحس ل پرسێن گرنگ بھێتە کرن، ب تایبەت چارەنڤیسێ پەیوەندیێن بەغدا و ھەرێما کوردستانێ، ب دیتنا من نوکە ھەڤڕایەکا گشتی ل بەغدا یا ھەی کو ل گەل جودابوون و سەربخوەیا ھەرێما کوردستانێ یە”.
حەرب دیارکر” نوکە پتریا لایەنێن سیاسی و وەلاتیێن عیراقی ھزرا سەربخوەیا کوردستانێ و جودابوونا وێ ژ عیراقێ پەسەند دکەن، راستە بەری نوکە ئەڤ چەندە رەت دکر، بەلێ دڤێ قۆناغێ دا ھزرەکا پەسەندکریە ب شێوەکێ بەربەلاڤ و وەلاتیێ ئاسایی ژی پێشوازیێ لێ دکەت”.
ب دیتنا تارق حەرب، سەربخوەیا ھەرێما کوردستانێ چارەکا باشە بۆ ھەرێمێ و بۆ بەغدا ژی و گۆت” دبیت پشتی سەربخوەیا ھەرێما کوردستانێ، پەیوەندیێن ب ھێز د ناڤبەرا ھەردو لایەنان دروست ببن، کو گەلەک د باشتربن ژ وان پەیوەندیێن نوکە د ناڤبەرا وان دا ھەین و ئەڤ چەندە دێ گەلەک ئاریشەیان ژی ب دووماھی ئینیت” .
ناڤبری ب دوور دبینیت شەڕ د ناڤبەرا ھەرێمێ و عیراقێ دا دروست ببیت ل دۆر پرسا سەربخوەیێ و دبێژیت”بەلێ کارتێکرنێن ناڤخوەیی و دەرڤە ژی ل سەر پرسا سەربخوەیا ھەرێما کوردستانێ یێن ھەین کو دبیت ببنە رێگر ل بەرامبەر بدەستڤەئینانا ڤێ ئارمانجێ، بۆ نموونەل دووڤ بۆچوونا من، نوکە دو ھەرێم، نەکو ب تنێ ھەرێمەک، ل کوردستانێ یێن ھەین، حزبێن سیاسی یێن کوردی ژی د ھەڤڕا نینن ل سەر پرسا سەربخوەیا کوردستانێ ودبیت کارتێکرنەکا دەرڤەیی ل سەر ڤێ چەندێ ھەبیت ب تایبەتی ژلایێ تورکیا و ئیرانێ و ئەمریکا ڤە”.
ڤی شارەزایێ قانوونی یێ عیراقی گۆت ژی” پێنگاڤێن ڤێ دووماھیێ یێن حوکمەتا ھەرێما کوردستانێ، دبیت ئیرانێ پالدەت کو جودابوونا کوردستانێ ژ عیراقێ پەسەند بکەت و وەکو تورکیا رازی ببیت ب وێ چەندێ”.
خویاکر ژی” بۆ ئیرانێ و تورکیا گرێدانا پەیوەندیێن ئابووری ل گەل ھەرێما کوردستانێ کاریگەریا خوە یا ھەی، بازارێ کوردستانێ یێ ب ھێزە ودبیت ئەو بازارە بۆ وان ھەردو وەلاتان ژ گەلەک بازارێن دی باشتر بیت، ڤێ ئێکێ ژی رۆلێ خوە یێ ھەی ل سەر پشت راستیا ئیرانێ و تورکیا ل ھەمبەر حوکمەتا ھەولێرێ، ئانکو ب شێوەکێ دێ دشێم بێژم، ئیران و تورکیا رێگریێ ل سەربخوەیا کوردستانێ ناکەن وەکو چاوان بەری نوکە دکر، چونکی دەست ژ بەرژەوەندیێن خوە یێن ئابووری بەرنادەن و دبیت ئەو بەرژەوەندیێن ئابووری یێن ھەردو وەلاتان ببنە فاکتەرەکێ فشارێ ل پاشەرۆژێ ل سەر ھەرێمێ، ھەکە ھات و ئالۆزیەک د ناڤبەرا وان دا پەیدابیت”.
ل دۆر پرسا مادێ 140 ژ دستوورێ عیراقێ، کو مادەکا تایبەتە ب دەڤەرێن ناکۆکی ل سەر ھەی د ناڤبەرا ھەرێمێ و بەغدا، کا چارەنڤیسێ وان دێ چ بیت، تارق حەرب گۆت” پێدڤیە بەغدا و ھەولێر ل سەر ڤی بابەتی رێککەڤن، ھەکە نە ئەڤ چەندە دێ پرسا سەربخوەیا ھەرێما کوردستانێ گیرۆکەت، ژ بەر کو پرسەکا ب ساناھی نینە و چەندین دەڤەران ژ چەندین پاریزگەھێن عیراقێ ب خوەڤە دگریت وەکو کەرکووک، خانەقین، مەخموور، شنگال و تلەعفەر”.
