بۆ ئێكلاكرنا وه‌زيرێن ماين عادل عه‌بدولمه‌هدى سێ پێشنياز داينه سه‌رۆكاتيا جڤاتا نوونه‌ران
ئه‌ڤرۆ نيوز، نيوار محه‌مه‌د سه‌ليم:
بڕياره ئه‌ڤرۆ روونشتنه‌كا دى يا جڤاتا نوونه‌رێن عيراقێ برێڤه بچت و تێدا سێ ته‌وه‌ر بهێنه گه‌نگه‌شه‌كرن كو گرنگترين ته‌وه‌ر ژى ده‌نگدانه ب وه‌زيرێن نوو يێن كابينا عادل عه‌بدولمه‌هدى.
ب گۆره‌يى كارناما جڤاتا نوونه‌رێن عيراقێ، بڕياره سێ ته‌وه‌ر ئه‌ڤرۆ بهێنه گه‌نگه‌شه‌كرن كو يا ئێكێ دێ ته‌ماشه‌كرن بيت د كه‌يسێ چه‌ند په‌رله‌مانتاران دا كو چه‌ند تان ل سه‌ر هه‌بووينه. ته‌وه‌رێ دويێ ژى دێ ده‌نگدان بيت ل سه‌ر په‌يره‌وێ ناڤخۆ يێ جڤاتا نوونه‌رێن عيراقێ و ته‌وه‌رێ سيێ ژى دێ ده‌نگدان بيت ل سه‌ر وه‌زيرێن نوو يێن جڤاتا نوونه‌رێن عيراقێ.
ئه‌ندامه‌كێ جڤاتا نوونه‌رێن عيراقێ د داخۆيانيه‌كێ دا بۆ ئه‌ڤرۆ نيوز دياركر كو ئه‌وان چو هيڤى نينن كو ئه‌ڤرۆ دووماهى ب كابينا عادل عه‌بدولمه‌هدى بهێت.
هندرين له‌زگين دۆسكى، ئه‌ندامێ جڤاتا نوونه‌رێن ل سه‌ر فراكسيۆنا پارتى ديموكراتى كوردستان گۆت: “هه‌كه برگا سيێ بهێته برێڤه‌برن و ده‌نگدان بهێته كرن ژى بۆ هه‌موو وه‌زاره‌تان ناهێته كرن”.
ئاشكه‌را ژى كو سه‌رۆك وه‌زيران سێ بژارده داناينه به‌ر سينگێ سه‌رۆكێ جڤاتا نوونه‌رێن عيراقێ كو بۆ وێ چه‌ندێ ره‌وش باشتر لێ بهێت و گۆت: “يا ئێكێ ئه‌وه كو هه‌موو وه‌زيران بێخنه به‌ر ده‌نگدانێ و كيش وه‌زير ده‌رباز بوو بهێته په‌سه‌ندكرن و يێن دى بهێنه گوهۆڕين، يا دويێ ژى ئه‌وه كو هنده‌ك وه‌زير بكه‌ڤنه به‌ر ده‌نگدانێ و يێن دى بۆ دو سێ حه‌فتيێن دى بمينن و يا سيێ ژى ئه‌وه كو ئه‌ڤ هه‌موو وه‌زيره بهێنه گوهۆڕين”.
ل ده‌ما سه‌ره‌دانا سه‌رۆك بارزانى بۆ لايێ عادل عه‌بدولمه‌هدى، پێشنيازا وێ چه‌ندێ كربوو كو وه‌زاره‌تا كۆچ و كۆچبه‌ران بده‌نه پارتى دا كو وه‌زاره‌تا داد ژى بۆ ئێكه‌تيێ بمينيت و ره‌وش باشتر لێ بهێت. ل دۆر ڤى بابه‌تى هندرين له‌زگين دۆسكى گۆت: “هه‌موو پێشبينى د ڤه‌كرى نه و هه‌ر تشت دبيت روو بده‌ت”.
عه‌بدولمه‌هدى دێ هه‌ر ئێك ژ فالح فه‌ياز وه‌كو وه‌زيرێ ناڤخۆ و فه‌يسه‌ل فه‌نه‌ر جه‌ربا وه‌زيرێ به‌ره‌ڤانيێ و دادوه‌ر دارا نوره‌دين وه‌زيرێ داد و سه‌با تائى وه‌زاره‌تا په‌روه‌ردێ و قوسه‌ى سه‌هيل وه‌زيرێ خواندنا بلند و ڤه‌كۆلينێن زانستى و عه‌بدولئه‌مير حه‌مدانى وه‌زيرێ ره‌وشه‌نبيرى و نورى دلێمى وه‌زيرێ پلاندانانێ و هه‌نا كوركيس وه‌زيرا كوچ و كۆچبه‌ران.
