بۆ جارا ئێكێ ئه‌مريكا ژنه‌كا كورد وه‌كو بالوێزا خوه ل بولگاريا ده‌ستنيشانكر
ئه‌ڤرۆ نيوز:
بۆ جارا ئێكێ د مێژوويا وه‌لاتێن ئێكگرتى يێ ئه‌مريكا دا، كورده‌ك ب ناڤێ هێرۆ قادر محه‌مه‌د ئه‌مين مسته‌فا وه‌كو بالوێزێ ئه‌مريكا ل كۆمارا بۆلگاريا ژ لايێ دۆنالد تره‌مپ سه‌رۆكێ ئه‌مريكا ده‌ستنيشان كر.
ئه‌ڤ ژنه خه‌لكا باژێرێ هه‌ولێرێ يه و چه‌ندين جاران به‌رپرساتى د حوكمه‌تا ئه‌مريكا دا هه‌بووينه، ل سالا 2016ێ ل بالوێزخانا ئه‌مريكا ل وه‌لاتێ پرتۆگال كار كريه و شيره‌تكارا سياسى بوويه و ل بالوێزخانا نێودێلى ل هندستان كار كريه.
ل سالێن 2009 بۆ 2011 شيره‌تكارا جۆ بايدن بوويه بۆ كاروبارێن رۆژهه‌لاتا ناڤه‌راست و ناڤه‌ند و باشوورێ ئاسيا.
هێرۆ ئێك بوويه ژ وان كه‌سان يێن نێزيكى چاڤدێريا دانوستاندنێن گرۆپێ 5+1 ل گه‌ل ئيرانێ. ل جڤاتا ئاسايشا نشتيمانى يا ئه‌مريكا، رێڤه‌به‌را كارێن ئيرانێ، ئسرائيل و فه‌لستين و ئوردن بوويه. ل سالا 2005ێ ب ئه‌ركه‌كێ سياسى ل باژێرێ مووسل كار كريه و چه‌ند به‌رپرساتيێن سياسى ل لوبنان و يونان و ئه‌ڤغانستان هه‌يه.
ئه‌و سياسيا كورد، ل ويلايه‌تا نورس داكوتا ژيانا خوه ب سه‌ر بريه و ژبلى ئنگليزيێ، زمانێن كوردى، عه‌ره‌بى، فارسى، يونانى، هندى و پرتۆگاليێ دزانيت. ل زانكۆيا پرينستۆن ماسته‌ر د خزمه‌تۆگزاريێن سياسه‌تا ژ ده‌رڤه دا ب ده‌ست ڤه ئينايه.
هێرۆ مسته‌فا ژ دايكبوويا 1973ێ يه ل باژێرێ هه‌ولێر و كچا تێكوشه‌رێ دێرين عه‌بدولقادر محه‌مه‌د ئه‌مين، دامه‌زرێنه‌ر و سه‌رنڤيسه‌رێ رۆژناما بارزانه كو ل ئه‌مريكا ده‌رچوويه.
