بۆ جارا ئێکێ داعش گەفا ژناڤچوونا ئیرانێ دکەت
ئەڤرۆ نيوز:
ل گۆر راپۆرتەکا ئاژانسا فرەنسا رێکخراوا تیرۆرستی یا داعشێ د گرتەکا نوو یا ڤیدیۆیی دا گەفان ل دەستھەلاتا ئیرانێ دکەت و دبێژیت کو ئیران بوویە ژێدەرێ ھەموو ئالۆزیان و دڤێت رژێما نھا یا ئیرانێ ژناڤ بچیت، داعش ئیرانێ ب تێکدانا رەوشا ناڤخوەیی یا سووریێ و عیراقێ تومەتبار دکەت و دیار دکەت کو پاسدارێن ئیرانێ ل عیراقێ و سووریێ خەلکێ مەدەنێ دکوژن و ژ بەر ھندێ ژی ئەو دێ شەرێ ئیرانێ کەن و رژێما مەلایێن ئیرانێ ژناڤ بەن.
د بەردەوامیا راپۆرتێ دا ئەو یەک ژی ھاتیە دیار کرن کو داعش گەفا ژناڤچوونا دەستھەلاتا شیعی یا ئیرانێ دکەت و رادگەھینیت ئەو دێ شیعان ژناڤ بەن و وەکو بەرێ دەستھەلاتەکا سوننە و ئیسلامی یا دروست ل ئیرانێ ئاڤا کەن و رێ نادەن ئێدی ئیران ببیتە ژێدەرێ ئالۆزیان ل رۆژھەلاتا ناڤین و دڤێت ئیران وەکو جاران ببیتە وەلاتەکێ ئیسلامی یێ سوننی.
ل دۆر گەفێن داعشێ د. حسین قوربانی ماموستایێ زانکۆیا تەھرانێ بۆ ھەمان ئاژانسێ دیار کریە کو ئەڤە جارا ئێکێ یە کو داعش ب رەنگەکێ ئاشکرا گەفان ل ئیرانێ دکەت و سەربازەکێ ئیرانی کو بەری نھا ل عیراقێ کەفتبوو دەستێ داعشێ ژی ب رەنگەکێ ھۆڤانە دھێتە کوشتن و ئەو یەک ژی نیشا ددەت کو داعش یا لاواز بووی و بەر ب نەمانێ ڤە دچیت، چونکو ئەڤرۆکە رۆژ ب رۆژێ داعش ئاخا ل ژێر دەستھەلاتا خوە ژ دەست ددەت و نەشێت وەکو بەرێ ژی شەری بکەت و چەکدارێن وێ رێکخراوێ ژی ئێدی باش دزانن سەردەمێ دەستھەلاتا وان ب دووماھی ھاتیە و گەلەک چەکدارێن داعشێ درەڤن و ئەو یەک ژی نیشا ددەت کو ئێدی داعشا جاران نەمایە کو بشێت ببیتە گەف ل سەر ئیرانێ یان ژی ھەر وەلاتەکێ دی یێ دەڤەرێ.
ھەژی ئاماژەپێدانێ یە کو بەری نھا چەندین جاران بەرپرسێن ئێمناھیێن ئیرانێ دیار کربوون وان چەندین شانێن نھێنی یێن داعشێ ل ئیرانێ ژناڤ برینە لێ ئەڤە جارا ئێکێ یە کو داعشێ ب رەنگەکێ ئاشکرا گەفان ل دەستھەلاتا ئیرانێ دکەت.
