بۆ كونترۆلكرنا میلیشیایان ئیراقێ پێدڤی ب قانوون و دادگەهێ هەیە
ئەندامەكێ دەستەیا كارگێرییا مەكتەبا سیاسی یا پارتی دیموكراتی كوردستان راگەهاند: ئیراق پێدڤی ب قانوونێ و دادگەهێ هەیە بۆ كەنترۆلكرنا میلیشا و دەركەفتییا ژ قانوونێ.
هوشیار زێباری، ئەندامێ دەستەیا كارگێرییا مەكتەبا سیاسی یا پارتی دیموكراتی كوردستان د دیدارەكا رۆژنامەڤانیدا ل گەل رۆژنامەیا (ناشنال) گوت» دەلیڤەیەكا زێرین یا ل پێشبەری ئیراقێ بۆ وێ چەندێ پێنگاڤان بەر ب پێشڤە ب هاڤێژیت، نوكە رەوشا ئەمنی ل هەموو ئیراقێ یا باشترە و هێرشێن تیرۆرستی یێن كێمتر بووین، لەوما دشێت وەبەرهێنەرێن بیانی رابكێشیت».
زێباری ئاماژە ب وێ چەندێ ژی كر» رەوشا ئیراقێ هاندەر بوو بۆ كۆمپانیێن ئەمریكی، ب تایبەتی د وارێ پەترۆلێدا كو بهێنە ئیراقێ و وەبەرهێنانێ بكەن».
سەبارەت هێرشێن درۆنی ل سەر هەرێما كوردستانێ ژی، هشیار زێباری گوت» حوكمەتا ئیراقێ نیازەكا یاقژ هەیە و ڤەكۆلین كریە، بەلێ پشتی تمامبوونا ڤەكۆلینان، ئەنجامدەرێن هێرشێت درۆنی ئاشكرا نەكرینە».
رۆهنكر ژی» ئیراق ژ هەموو تشتەكی زێدەتر، پێدڤیە ب سەقایەكێ باش و ئارام هەیە بۆ وەبەرهێنانێ، هەروەسا پێدڤی ب قانوونێ و دادگەهێ هەیە بۆ كونترۆلكرنا میلیشیا و دەركەفتیێن ژ قانوونێ».
