بۆ مه‌ره‌ما پێكئينانا حوكمه‌تێ چه‌ند شاندێن عيراقێ سه‌ره‌دانا هه‌رێمێ دكه‌ن
ئه‌ڤرۆ نيوز، فاتما مزوورى:
ب مه‌ره‌ما دانوستاندنا ژبۆ پرسا پێكئينانا حوكمه‌تا نوو يا عيراقێ ل گه‌ل لايه‌نێن سه‌ركه‌فتى يێن هه‌رێما كوردستانێ، چه‌ند شاندێن عيراقێ سه‌ره‌دانا هه‌ولێرێ كرن.
دوهى ئێڤارى شانده‌كێ هه‌ڤپه‌يمانيا فه‌تح ب سه‌رۆكاتيا ئه‌حمه‌د ئه‌سه‌دى گه‌هشته هه‌ولێر و ژ لايێ ئه‌ندامێن شاندێ دانوستاندنكارێن پارتى ل گه‌ل به‌غدا هاته پێشوازيكرن.
ئه‌سه‌دى بۆ كوردستان 24 گۆت: “مه‌ره‌م ژ سه‌ره‌دانا مه بۆ ئه‌نجامدانا هه‌ڤديتنايه ل گه‌ل لايه‌نێن كوردستانى يێن سه‌ركه‌فتى و گه‌نگه‌شه‌كرنه ل سه‌ر وى پرۆژێ فه‌تح به‌رى نها ئاماده كرى”.
سه‌رۆكێ شاندێ هه‌ڤپه‌يمانيا فه‌تح گۆتژى: “ئه‌م دێ ل سه‌ر وان بنه‌مايێن حكومى ئاخڤين كو دڤێت هه‌موو لايه‌ن ل سه‌ر رازى بن”.
دا زانين ژى كو ئه‌و دخوازن له‌زێ د پێكئينانا حوكمه‌تا نوو يا عيراقێ دا بكه‌ن ژ به‌ر كو نها عيراق د گه‌له‌ك كێشه‌يان دا ده‌رباز دبيت و گۆت: “دبيت جوداهى د ناڤبه‌را مه دا هه‌بن، به‌لێ دڤێت هه‌موو كێشه ژى ب گۆره‌ى دستوورى بهێنه چاره‌كرن”.
ژ لايه‌كێ دى ڤه شڤێدى شانده‌كێ ده‌وله‌تا قانوونێ ژبۆ هه‌مان مه‌ره‌م سه‌ره‌دانا هه‌ولێر كريه و بڕيار ئه‌وه ل گه‌ل لايه‌نێن سياسى ده‌ست ب دانوستاندنان بكه‌ن.