بۆ هێزێن خوه ل عيراقێ ئه‌مريكا داخوازا بودجه‌كێ ژ به‌غدا دكه‌ت
ئه‌ڤرۆنيوز:
رۆژنامه‌كا لوبنانى به‌لاڤكر كو فه‌رمانده‌كێ له‌شكرێ ئه‌مريكى داخوازكريه دبودجا سالا 2019 يا عيراقێ دا، برگه‌ك بهێته دانان وخه‌رجيێن هێزێن ئه‌مريكى ل عيراقێ تێدا بهێته نڤيسين.
رۆژناما (الاخبار) يا لوبنانى دهژمارا خوه يا ئه‌ڤرۆ شه‌مبيێ 12/1/2019 به‌لاڤكر كو شيره‌تكاره‌كێ سه‌رۆك وه‌زيرێن عيراقێ عادل عه‌بدولمه‌هدى دياركريه كو داخوازه‌ك ژلايێ فه‌رمانده‌كێ له‌شكرێ ئه‌مريكى گه‌هشتيه ده‌ستێ وى ل دۆر دانانا برگه‌كێ بۆ خه‌رجيێن له‌شكرێ ئه‌مريكى ل عيراقێ، چونكى ئه‌مريكا خزمه‌ته‌كا مه‌زن پێشكێشى گه‌لێن عيراقێ يا كرى دچارچۆڤێ هه‌ڤپه‌يمانيا نێڤده‌وله‌تى يا دژى داعشێ دا.
د راپۆرتا رۆژناما لوبنانى دا هاتيه ژى كو وى شيره‌تكارێ سه‌رۆك وه‌زيرێن عيراقێ ئاماژه كريه كو ئه‌مريكا پلان يا هه‌ى بۆ زێده‌كرنا هێزێن خوه ل عيراقێ ودخوازيت خه‌رجيێن هێزێن خوه بێخيته ستوويێ حوكمه‌تا عيراقێ، چونكى هێزێن عيراقێ شيانێن پاراستنا وه‌لاتێ خوه نينن.
وى رۆژنامێ به‌لاڤكر كو ئه‌و پلان وپێشنيازه ل گه‌ل ستراتيژيه‌تا سه‌رۆكێ ئه‌مريكى دۆنالد ترامپ هه‌ڤدگريت كو ترامپى دڤێت سنوره‌كى بۆ خه‌رجيێن هێزێن ئه‌مريكى ل رۆژهه‌لاتا ناڤه‌راست ب دانيت.
به‌لێ هه‌تا نوكه چو به‌رپرسه‌كێ ئه‌مريكى وعيراقى ب فه‌رمى هه‌بوونا پێشنيازه‌كێ يان داخوازيه‌كا ب وى جۆرى ئاشكرا نه‌كريه.
