بۆ هەلبژارتنێن پەرلەمانێ كوردستانێ ئەڤرۆ دێ دەست ب نووكرنا تۆمارێن دەنگدەران هێتە كرن
ئەڤرۆ، زنار تۆڤی:
رۆژا شەمبی 12/8/2023 دووماهی رۆژا نووكرنا تۆمارا دەنگدەران بوو بۆ هەلبژارتنێن جڤاتێن پارێزگەهێن ئیراقێ، دیسا ئەڤرۆ 13/8/2023 بۆ دەمێ مەهەكێ تۆمارا دەنگدەران بۆ هەلبژارتنێن پەرلەمانێ كوردستانێ دێ هێتە نووكرن.
خالد عەباس، بەرپرسێ نڤیسینگەها دهۆكێ یا كۆمسیۆنا بلندا سەربخوە یا هەلبژارتنێن ئیراقێ بۆ رۆژناما ئەڤرۆ گۆت: «دوهی دووماهی رۆژا نووكرنا تۆمارا دەنگدەران بوو، بۆ هەلبژارتنێن جڤاتێن پارێزگەهێن ئیراقێ و بەغدا ئەو هایدار كرینە، كو ژ ئەڤرۆ وێڤە بۆ ماوێ مەهەكێ دێ نووكرنا تۆمارا دەنگدەران دەست پێكەت، كو دێ یا تایبەت بیت ب پارێزگەهێن هەرێما كوردستانێ ڤە.
ناڤهاتی گۆتژی: «نوكە نووكرنا تۆمارا بایۆمەتری ل هەموو ئیراقێ راوەستیایە و ب تنێ ل هەرێما كوردستانێ بۆ دەمێ مەهەكێ هاتە دریژكرن، ئەڤرۆ رۆژا ئێكشەمبی دێ دەست پێكەت هەتا 12ی مەها ئیلۆنێ، ئەڤ نووكرنا تۆمارا دەنگدەران بەرهەڤینە بۆ ئەنجامدانا هەلبژارتنێن پەرلەمانێ كوردستانێ، دیسا ژ دایكبوویێن سالا 2006 ێ ژی دێ هێنە تۆمار كرن، ل چەند رۆژێن بهێن دێ ناڤێن وان ژی هێنە تۆمار كرن، هەروەسا ل پارێزگەها دهۆكێ 887 هزار و 110 دەنگدەر هەنە».
