بۆ کاراکرنا پەرلەمانی پارتی پێشنیازەکا نوو یا ھەی
ھەولێر، قائید میرۆ:
ل رۆژێن داھاتی دێ پارتی دیموکراتی کوردستان پێشنیازەکا دی دەتە بزاڤا گۆڕان و لایەنێن سیاسی بۆ کاراکرنا پەرلەمانێ کوردستانێ و جێگرا سەرۆکا فڕاکسیۆنا پارتی ل پەرلەمانێ کوردستانێ دبێژیت، پێدڤیە ڤێ جارێ گۆڕان ب ڤێ پێشنیازا پارتی رازی بیت و پارتی ژ پێخەمەت سەرخستنا پڕۆسا ریفڕاندۆمێ یا بەرھەڤە ھەموو کارەکی بکەت.
ئامینا زکری، جێگرا سەرۆکا فڕاکسیۆنا پارتی ل پەرلەمانێ کوردستانێ بۆ رۆژناما ئەڤرۆ گۆت” پارتی ئێکە ژوان ھێزێن خوە ب خۆدان و دامەزرێنەرێ پەرلەمانێ کوردستانێ دزانیت، لەوڕا پارتی ھەتا نوکە چەندین پێشنیاز بۆ کاراکرنا پەرلەمانی یێن داینە لایەنێن سیاسی و ھەموو بزاڤەکێ دێ کەت ژی بۆ وێ چەندێ کو ئاریشەیێن ناڤخوەیی بھێنە چارەسەرکرن، ھەروەسا پارتی یا بەرھەڤە ھەموو کارەکی بکەت ژبۆی پڕۆسا ریفڕاندۆمێ سەرکەڤیت، بەلێ بزاڤا گۆڕان یا بەرھەڤ نینە بۆ کاراکرنا پەرلەمانی، مخابن ھەموو ئەو پێشنیازێن ژلایێ پارتی دیموکراتی کوردستان ھاتینەکرن ژلایێ بزاڤا گۆڕانێ ڤە یێن ھاتینە رەتکرن، بەلێ پێدڤیە ڤێ جارێ ھەموو لایەنێن سیاسی خەمەکێ ژ چارەکرنا پرسێن ناڤخوەیی بخۆن ، چونکە یا خویایە ئەم یێن د قۆناغەکا ھەستیاردا دەرباز دبین و ھەرێما کوردستانێ یا بەر ب ئەنجامدانا پڕۆسا ریفڕاندۆم و سەربەخۆیا کوردستانێ دچیت، ئەرکێ ھەموو لایەنێن سیاسیە بزاڤا بکەن پەرلەمان بھێتەکاراکرن.
ئامینا زکری گۆت ژی” بڕیارە ل رۆژێن بھێت پارتی دیموکراتی کوردستان پێشنیازەکا نوو بدەتە بزاڤا گۆڕان بۆ کاراکرنا پەرلەمانی، بەلێ دخوازین گۆڕان ب دو پەیڤان ل دەزگەھێن راگەھاندنێ ڤێ پێشنیازا پارتی رەت نەکەت، بەلکۆ ب رێیا دانوستاندنان ئاریشە بھێتە چارەسەرکرن و ھەکە ڤێ جارێ گۆڕان رازی نەبوو، ئەڤە کارانەکرنا پەرلەمانی دکەڤیتە ستویێ بزاڤا گۆڕان، ژبەرکو دڤێت بەری ئەنجامدانا ریفڕاندۆم و ھەلبژارتنێن داھاتی، پەرلەمان بھێتە کاراکرن، ھەکە ھەتا وی دەمی پەرلەمان نەھێتە کاراکرن، دێ ل 6/11/2017 دەمێ قانوونیێ پەرلەمانی ب سەرڤەچیت و پەرلەمان دێ ھەلوەشیت، پێدڤیە ل سەر لایەنێن سیاسی ڤێ پێنگاڤێ ب ھاڤێژن بۆ کاراکرنا پەرلەمانی بەری دەمێ وی یێ قانوونی ب دووماھی بھێت.
ل گورەی پێزانینێن ب دەست رۆژناما ئەڤرۆ کەفتین، پارتی دیموکراتی کوردستان ب رێیێن جودا ئەڤ پێشنیازە یا دایە بزاڤا گۆڕان، کو پارتی یا رازی یە دکتۆر یوسف محەمەد سەرۆکێ پەرلەمانێ کوردستانێ ڤەگەڕیت سەرکارێ خوە ھەتا دووماھی ھاتنا خۆلا پەرلەمانی و ھەموو وەزیر و بەرپرسێن گۆڕان یێن حوکمەتێ ڤەگەڕن سەر کارێن خوە، بەلێ ھێشتا بزاڤا گۆڕان ب فەرمی بەرسڤا ڤێ پێشنیازا پارتی نەدایە.
