بیرێن ئرتیوازی ئاڤا بن ئەرد 65 مەتران ئینایە خوار
ئەڤرۆ نیوز:
ل گۆرەی ئامارێن رێڤەبەریا گشتیا سەرچاڤێن ئاڤێ ل ھەرێما کوردستانێ، نھا ل ھەرێمێ زێدەتر ژ 40 ھزار بیرێن ئرتیوازی یێن بن ئەرد ھاتینە لێدان و 50% ژ وان بێ مۆلەت و دەستووریا حوکمەتێ ھاتینە لێدان و ژ وان بیرێن بێ مۆلەت ژی ھاتینە لێدان 82% ل پارێزگەھا سلێمانیێ نە. ژێدەرەک ژ وەزارەتێ ژی دبێژیت: لێدانا زێدە یا بیرێن ئرتیوازی بوویە ئەگەر کو ل ھندەک جھان ئاڤ 65 مەتران دابەزیە و ل ھندەک جھان 20 ھەتا 40 مەتران ژی ئینایە خوار.
ل گۆرەی پێزانینێن رۆژناما ئەڤرۆ، ھەتا نھا ل پارێزگەھا دھۆکێ نێزیکی سێ ھزار بیرێن ئرتیوازی ھاتینە کۆلان، داخوازیێن کۆلانا بیران ژی ھەردەم د زۆرن، چونکو ھەر کەسێ پارچە ئەرد یان مولکەک ل گوندێ خوە ھەبیت، ئەو جھە ب دەلیڤە دیت بۆ چاندنێ بکاردئینا و ئەڤە ژی پێدڤی ب کۆلانا بیرەکێ بوویە. لێ پشتی گوھۆرینا مەرجێن کۆلانا بیران و ھندەک مەرجێن کۆلانا بیران یێن قورس ھاتینە دانان وەکو، دڤێت ئەرد ژ 10 دونەمان کێمتر نەبیت و سەنەدا ئەردی ب ناڤێ وی بیت و ھندەک مەرجێن دی، داخوازی ل سەر کۆلانا بیران گەلەک کێمتر لێ ھات.
جیۆلۆجیێ شارەزا جەمیل ئوسمان دیارکر ژی کو ھەرێما کوردستانێ دەڤەرەکا بارانی یە و گەلەک بەفر و باران لێ دھێن، ئەڤە ژی دبیتە ئەگەر کو سالانە بیرێن ئاڤێ ئاڤا خوە نوو بکەنەڤە و جارەکا دی ئەو کانیێن ئاڤ ژێ دھێت پرببنەڤە، بن ئەردێ کوردستانێ ژ بەر ھاتنا بارانان ھەردەم یێ پری ئاڤە و ھەکە ھات و سالەکێ یان دویان کێم باران ژی بباریت، رەنگە کانی ھشک نەبن و گۆت: ھندەک بیرێن ئاڤێ ھەنە 70 ھەتا 100 سالان دومێ دکەن، ب مەرجەکی ھەکە چەند سالەکان ب ئێکجاری بەفر و باران نەھێن، ل وی دەمی دێ بیر ژ ئاڤێ ھشکبن.
ئەندازیار محەمەد ئەمین، رێڤەبەرێ گشتیێ سەرچاڤێن ئاڤێ ل ھەرێما کوردستانێ بۆ ئەڤرۆ دیار کر، نھا ل ھەرێما کوردستانێ 40 ھزار و 608 بیرێن ئرتیوازی ھاتینە لێدان و ژ ڤی سەرجەمی ژی 20 ھزار و 800 بیر بێ مۆلەت ھاتینە لێدان و ژ ڤان ژی 82% ل پارێزگەھا سلێمانیێ نە و گۆت ژی: لێدانا زێدە یا بیرێن ئرتیوازی بوویە ئەگەر کو ئاڤا بن ئەرد ب رێژەکا مەترسیدار ھاتیە خوار ب شێوەکی کو ل ھندەک جھا ھەتا 65 مەتران ھاتیە خوار.
ناڤبری ئاماژە دا وێ چەندێ، وەزارەتا چاندنێ ب رێیا 108 بیران چاڤدێریا ئاڤا بن ئەرد دکەت و د رێیا ڤان بیران دا ئاشکرا بوویە کو ل پارێزگەھا ھەولێرێ ل ھندەک جھان ئاستێ ئاڤێ 65 مەتران دابەزیە و ل شەقلاوە 35 مەتران ھاتیە خوار، ل دھۆکێ ب تایبەت ل قەزا ئاکرێ ئاستێ ئاڤێ گەلەک ھاتیە خوار و ل پارێزگەھا سلێمانیێ ژی ژ بەر زێدە لێدانا بیران، ھژمارەکا مەزن یا بیرا ھشکبووینە.
ئەندازیار دیندار محەمەد سەلیم، رێڤەبەرێ ئاڤا دەوروبەرێن پارێزگەھا دھۆکێ بۆ ئەڤرۆ دیار کر، د ماوەیێ چەند سالێن بووری دا ھەر گوندەکێ چو ژێدەرێن ئاڤێ نەبانە و جھەکێ گونجای و یێ ب ئاڤ بۆ کۆلانا بیرەکێ ھەبایە، دا بیرەکێ ئاڤێ بۆ وان ھێتە کۆلان و ب رێیا وێ بیرێ ژێدەرێ ئاڤا ڤەخوارنێ بۆ وی گوندی دھاتە دابینکرن.
ناڤبری زێدەتر گۆت: د چەند سالێن بووری دا 41 بیر ھاتینە کۆلان و بووینە ژێدەرێن سەرەکی یێن ئاڤا ڤەخوارنێ بۆ وان گوندان و مفایەکێ باش ژێ ھاتیە وەرگرتن، نھا ژی داخوازیێن 30 گوندێن پارێزگەھا دھۆکێ ل بەر دەستێ مە ھەنە بۆ کۆلانا بیران، بەلێ ژ بەر تێکچوونا رەوشا ئابووری یا ھەرێمێ ھەتا نوکە ئەڤ داخوازیە نەھاتینە بجھئینان.
ئەندازیار دیندار محەمەد سەلیم ئاماژە ب وێ یەکێ کر کو پتریا پرۆژێن بیرا یێن دھێنە کۆلان د دومدرێژن و بەردەوام ئاڤ ژێ دھێت، چونکو چەند د زڤستانێ دا باران دباریت ئەڤ بیرە پری ئاڤ دبنەڤە و ئاڤێن کانیان زێدەتر لێ دھێن و گۆت: دەمێ بیرەک دھێتە دانان و دبیتە پرۆژە، ئامیرێ کلورکرنا ئاڤێ ژی ل سەر دھێتە دانان، بەلێ ھەکە ھات و گوندەک ھەموو ھاتە پشکنینکرن و چو ژێدەرێن ئاڤێ بۆ کۆلانا بیرەکێ لێ دیارنەبوون، ل وی دەمی دێ ناچاربین ژێدەرەکێ دی یێ ئاڤێ بۆ گوندی بینین یان ژی ئاڤێ ژ گوندەکێ نێزیک وان بۆ بکێشین.
