بێوار عەباس: د ناخێ من دا سینەمایەک هەیە
زارڤەکەر بێوار عەباس کێستەی ددیدارەکێ دا بو بەرپەرێ هونەری یێ ڕۆژنامەیا ئەڤرۆ گۆت: ل دەستپێكا من یا هونەری و جیهانا زارڤەكرنێ بۆ سالا 2005ێ ڤەدەگەڕێت، كاوەختێ من ب ئاوایەكێ فەرمی دەست ب ڤی كارێ پیرۆز كری، ئێكەم ئەزموونا من یا ئەكتەریێ و پشكداربوونا من د گۆڕەپانا هونەری دا ڕاستەوخۆ د ناڤەڕۆكا فیلمەكی دا بوو كو بناڤێ (ژیارا گوندا) هاتە ناسكرن. د ڤی فیلمی دا من ڕۆلێ رەشەكێ ئاغای دگێڕا، ئەڤ كارە بوو هێنەرا سەرەكی كو ئەز پتر بڕژدی ل سەر ڕێكا خۆ یا هونەری بەردەوام بم و بكەڤمە د ناڤ جیهانا دراما و هونەری دا.
بێواری زێدەتر گۆت: د ڤێ ڕێكا درێژ و پڕ ژ ئاستەنگ دا، كەسانێن گەلەك نێزیک بوونە هۆكارێ سەركەفتنا من. خالێ من، هونەرمەندێ دیار و زارڤەكەرێ بەرنیاس رەمەزان سەعید گەلەك پشتەڤانیا من كر، ڕێكێن دروستێن زارڤەكرنێ نیشانی من دان و بوو ئیلهام بەخشێ من د ڤی بواری دا. هەروەسا ئەندامێن خێزانا من هەموو ب بێ بەرهەڤی و ب شێوەیەكێ بەردەوام دهاریكار بوون و پالپشتیا من دكر دا كو ئەز بشێم دەست ژ حەزا خۆ بەڕنەدەم و سەركەفتنێن باشتر ب دەست ڤە بینم.
ئەوچەندەژی گۆت: من د ئەزموونا خوە دا دەرفەت هەبوویە دگەل گەلەك دەزگەهـ و كەسایەتیێن هونەری کار بئێخمە سەری ل كەناڵێ دهۆك تیڤی من دگەل هۆنەرمەند سەعید و هونەرمەند عادل کاركریە و كارێن بەرهەمدار ئەنجام داینە. هەروەسا ل كەناڵێ ئافا ژی من دگەل بەیار عیزەت كار كریە، ل سەر ئاستێ حەز و خولیا زارڤەكرنێ، ئەز گەلەك حەژ ڕۆلێن تراژیدی دكەم، چونكی هەست ب كویری و ڕاستگۆیا وان دكەم، بەلێ بەرۆڤاژی ڤێ چەندێ، ئەز ب هیچ ڕەنگەكی حەژ كۆمیدیێ و ڕۆلێن كۆمیدی ناكەم.
دلایەکێ دی دا گۆتژی: من گەلەك حەز ل سەر جیهانا فیلم و سینەمایێ هەیە و هزرەكا داهێنەرانە د ناڤ ناخێ من دا هەیە، بەلێ مخابن هەتا نوكە دەرفەتێن دروست نەبووینە و من هیچ كارەكێ سینەمایی ئەنجام نەدایە. بەلێ ژلایێ دی ڤە، كاركرن د ناڤ جیهانا درامایێ دا بۆ من گەلەك خۆشە و هەست ب ئارامی و سەركەفتنێ دكەم دەمێ بەشدار د درامایێن نەتەوەیی و جڤاكی دا دكەم.
هەروەسا گۆت: د ڕێڕەوا كارێ من دا، من د بەرنامێ هەرمان دا كار كریە ل كورماکس و سەربارەی ڤێ چەندێ، د دنیایا موزیكێ دا من هەڤكاریا هونەری دگەل هونەرمەندێ مەزن مامۆستا حەسەن شەریف كریە؛ من د دو كلیپێن پروفیشال دا ڕۆلێ زارڤەكرنێ گێڕایە، كو ئەڤ ژی كلیپا ستڕانا ناڤدار سترانا دوكوتر بوو، هەروەسا كلیپا دووێ ژی یا سترانا گەل پشتی تە ئەز نە مرم بوو.
