بێھنا تەرمێن د بن ئاڤاھیێن مووسل دا مایی خەلک بێزار کریە
ئه‌ڤرۆ نيوز:
بەرپرسەکێ پارتی دیموکراتی کوردستان ل مووسل ئاشکرا کر کو ھژمارەکا زۆرا تەرمێن سەردەمێ شەڕێ داعش ل بن ئاڤاھیێن ھەرفتی ماینە و خەلکێ مووسل بێزار کریە. دیارکر ژی، داعش چەند رۆژەکە چالاکیێن خوە زێدە کرینە.
شێخ محیەدین مزووری، کارگێڕێ لقێ 14یێ پارتی ل مووسل بۆ رۆژناما ئەڤرۆ گۆت: “چەند رۆژەکە داعش دەست ب چالاکیێن خوە کریە ڤە ل مووسل و ل چەند رۆژێن بۆری شانەیێن نڤستی یێن داعش چەندین چالاکی ل سەنتەرێ باژێڕێ مووسل و ناحیا بادۆش ئەنجام داینە و زیان گەھاندینە ھێزێن عیراقی و وەلاتیێن جھێ بوویەر چێبووین، لەوڕا ژی نوکە مەترسیێن داعش زۆرتر بووینە ل سەر مووسل و رۆژ بۆ رۆژێ یێ دەردکەڤن”.
شێخ محیەدین مزووری گۆت: “ھژمارەکا زۆرا تەرمێن ژ ئەنجامێ شەڕێ داعش دبن ئاڤاھیێن ھەرفتی دا ماینە، ب تایبەتی ل مووسلا کەڤن، کو خەلکێ مووسل بێزار کرینە ھەر چەندە رۆژانە ژ لایێ کەس و کارێن وان و رێکخراوێن نێڤدەولەتی ھژمارەکا تەرمان دھێنە دەرخستن، بەلێ ھژمارا ئەڤان تەرمان ھند یا زۆرە چەند بھێنە دەرکرن ژی ھەر دمینن، چونکو ناھێتە ڤەشارتن ھژمارەکا زۆرا ئاکانجیێن مووسل ددەمێ سێ سالێن بۆری دا ھاتینە کوشتن و ل بن ئاڤاھیان ماینە”.