بێی پشتەڤانيیا کوردان ئەردۆغان جارەکا دی نابیتە سەرۆک کۆمار
ب، سه‌رجان مەحمود:
ئەندامەکێ پەرلەمانێ تورکیا دیار دکەت، دڤێت هەتا دووماهیا ئەڤسالە گوهۆڕینێن مەزن ل تورکیا روو بدەن و هەروەسا دڤێت گەلەک چاکسازی ژی بهێنە و ئاشکرایە بێی پشتەڤانیا کوردان ئەردۆغان نەشێت جارەکا دی ببیتە سەرۆک کۆمارێ تورکیا.
جەنگیز چاندار ئەندامێ پەرلەمانێ تورکیا سەر ب فراکسیۆنا دەم پارتی دیار کر، کورد ب هەموو هێزا خوە پشتەڤانیێ ل قووناغا ئاشتیێ دکەن، لێ مخابن هەتا نها ژ ئالیێ دەولەتا تورکیا ڤە ب کریاری چو نەهاتیە کرن، ئەو یەک ژی وەسا کریە کو نها کورد دو دلن، بێگومان کورد مافدارن ژی، چونکی بەری نها چەندین جاران کار بۆ ئاشتیێ ل تورکیا هاتیە کرن و پاشی ژی ئالۆزی دروست بووینە، دەولەتا تورکیا هەتا نها ب کریاری ژ بۆ چارەسەرکرنا پرسا کوردی چو نەکریە و گۆت: (بابەت تنێ راگرتنا شەڕێ چەکداری نینە، بابەت مافێ گەلێ کوردە ل تورکیا، چونکی ب سالانە شەڕەک مەزن هاتیە کرن، ب هزاران کەس بووینە قوربانی، ب هزاران گوند وێران بووینە، چارەسەرکرنا پرسەکا وەسا مەزن وەکو پرسا کوردی ژی ب ساناهی نینە، لێ هەکە دەولەتا تورکیا بڤێت بێگومان دشێت پرسا کوردی چارەسەر بکەت).
ئەندامێ پەرلەمانێ تورکیا د بەردەوامیا ئاخڤتنا خوە دا ئەو یەک ژی دیار کر، دڤێت بەری هەر تشتەکێ سەلاحەدین دەمیرتاش هەڤسەرۆکێ بەرێ یێ هەدەپێ بهێتە ئازاد کرن، هەروەسا گرنگە د زووترین دەم دا هەڤسەرۆکێن باژێرڤانیان یێن کو ب دەنگێن کوردان هاتینە هەلبژارتن و ژ بەر هندەک ئەگەرێن سیاسی ژ کاری هاتینە دوورخستن ڤەگەرنە ڤە سەر کارێن خوە، ژ بۆ ڤێ یەکێ ژی دڤێت ئێدی سیاسەتا قەیوومان ل تورکیا ب دووماهی بهێت و رێز ل دەنگێ گەلێ کورد بهێتە گرتن و گۆت: (دڤێت چاکسازیێن قانوونی بهێنە کرن، دڤێت هندەک یاسایێن نوو دەرکەڤن و پەروەردەیا ب زمانێ کوردی ژی ل تورکیا ببیتە فەرمی، ژ بەر ڤێ یەکێ ئەم دبێژین هەتا دووماهیا ئەڤسالە گرنگە گەلەک تشتێن باش ل تورکیا روو بدەن دا باوەری ژی بۆ کوردان دروست بیت، مخابن هەتا نها چو پێنگاڤێن دلخوەشکەر نەهاتینە ئاڤێتن).
جەنگیز چاندار د پشکەکا دی ئاخڤتنا خوە دا بەحسێ ڤێ یەکێ ژی کر کو، بابەتان چەکێن پەکەکێ بەر ب دووماهیێ ڤە دچیت، ل گۆر بەرپرسێن تورکیا دبێژن هەتا نها کارێن گەلەک باش هاتینە کرن، لێ مخابن ل هەمبەر دا ژ ئالیێ دەولەتا تورکیا ڤە چو نەهاتیە کرن، کورد چاڤەرێنە کو ب کریاری هندەک تشت بهێنە کرن، راستە ئەردۆغان و بەرپرسێن دی یێن تورکیا رۆژانە ئاخڤتنێن خوەش دکەن و بەحسێ برایەتیا کوردان و تورکان دکەن، لێ ژ بۆ چارەسەرکرنا پرسا کوردی دڤێت هندەک کارێن گرنگ بهێنە کرن کو مخابن هەتا نها ژ بۆ ڤێ یەکێ دەولەتێ چو نەکریە و گۆت: (ئێدی نەخشێ سیاسی یێ تورکیا ژی هاتیە گوهۆڕین و وەکو بەرێ نەمایە، هەکە ڤێجارێ ژی ئەردۆغانێ بڤێت ببیتە سەرۆک کۆمارێ تورکیا دێ پێدڤی ب پشتەڤانیا کوردان بیت، ژ بۆ ڤێ یەکێ ژی ئەم دبێژین گرنگە هەتا دووماهیا سالێ گەلەک گوهۆڕینێن باش ل تورکیا روو بدەن).
سەبارەت ب هەلوەستێ دەم پارتی ل دۆر هەلبژارتنا ئەردۆغانی وەکو سەرۆک کۆمارێ تورکیا ژی چانداری دیار کر، وی دەمی دڤێت هەتا هەلبژارتنان هندەک تشت بهێنە کرن، بابەتێ زمانێ کوردی ل تورکیا دڤێت ب فەرمی بهێتە ئێکلا کرن، هەروەسا دڤێت بابەتێ پێناسەکرنا وەلاتیبوونێ ژی ل تورکیا بهێتە گوهۆڕین، چونکی د دستووری تورکیا دا وەسا هاتیە کو هەر کەسێ ل تورکیا دژیت تورکە، لێ نها بەرپرسێن تورکیا بخوە ژی ئاماژە ب ڤێ یەکێ دکەن کو دستوورێ نها بەرهەمێ کۆدەتایا سالا ١٩٨٠ یە و دڤێت بهێتە گوهۆڕین، وی دەمی گرنگە بابەتێ پێناسەیا وەلاتیبوونێ بهێتە گوهۆڕین و گۆت: (پێدڤیا تورکیا ب دستوورەک نوو و دیموکراتی هەیە، هەکە د دستوورێ نوو دا هەبوونا گەلێ کورد ب فەرمی بهێتە قەبوول کرن وی دەمی کورد دێ رۆلەکێ سەرەکی و ئاڤاکەر ژ بۆ پێشڤەچوونا تورکیا گێرن، هەکە زۆرداریا ل سەر کوردان ل تورکیا نەمینیت ئەو یەک دێ بیتە ئەگەرێ بهێزبوونا تورکیا).
پەرلەمانتارێ تورکیا ژ فراکسیۆنا دەم پارتی ئاماژە ب رۆلێ ئۆجەلانی ژی کر و دیار کر، باخچەلی ڤێ دووماهیێ بەحسێ هندێ کر کو دڤێت ئۆجەلان وەکو بەرپرسیارێ قووناغا ئاشتیێ بهێتە دەستنیشان کرن و ب رۆلێ خوە رابیت، وی دەمی گرنگە ئاستەنگێن ل هەمبەر ئۆجەلانی نەمینن، دڤێت ئۆجەلان بشێت ب ئازادانە پەیوەندیان ل گەل نڤیسەر و رۆژنامەڤان و کەسێن سیاسی دروست بکەت و هەروەسا ب ئازادنە ژی نێرینێن خوە دیار بکەت، ئەو یەک گەلەک گرنگە، چونکی نها ژی ئاستەنگی هەنە و بابەت تنێ ب رێیا شاندێ ئیمرالیێ نابیت و گرنگە دەلیڤە ب ئۆجەلانی بهێتە دان دا ئەو بشێت وەکو پێدڤی ب رۆلێ خوە بۆ پێشڤەبرنا قووناغا ئاشتیێ رابیت.
ناڤهاتی د دووماهیا ئاخڤتنا خوە دا ئەو یەک ژی دیار کر، ئەو گەشبینە هەتا دووماهیا سالێ هندەک تشتێن باش ل تورکیا روو بدەن و هەروەسا ژ بۆ چارەسەرکرنا پرسا کوردی ژی پێنگاڤێن باش بهێنە ئاڤێتن، چونکی چو رێیێن دی نینن و تورکیا نەچارە پرسا کوردی چارەسەر بکەت و نها ژی رەوش گەلەک یا گونجایە.
