بێ بریارا وەزارەتێ کامیرە د ناڤ پۆلان دا دھێنە دانان
ئەڤرۆ:
ھاتینە ھایدارکرن کو ھندەک رێڤەبەرێن قوتابخانا مامۆستایێن خوە ھایدارکرینە کو ئێدی دێ کامیران دناڤ پۆلان دانن و دێ چاڤدێریا مامۆستایان ھێتەکرن، مامۆستا ب ڤێ پێنگاڤێ دلگرانیا خوە نیشان دا کو چاڤدێری ب کامیران بھێتەکرن، پشتی دووڤچوونا مە ھاتە زانین کو کامیرێن چاڤدێریێ ل چەندین قوتابخانێن دھۆک ھاتینە دانان، بێ بریارەک ژ وەزارەتا پەروەردێ دەرکەڤیت و ھەر قوتابخانەکێ ژ پارێ حانوتان و ل دووڤ حەزا خوە کامیرە داناینە.
قوتابخانا مەمێ ئالان ٣٠ کامیرە ل قوتابخانا خوە و ل ھەموو جھان و ھەتا د ناڤ پۆلان دا داناینە، ھەوار حەسەن محەمەد رێڤەبەرێ قوتابخانا ناڤبری گۆت: ب دو قوناغا مە کامیرە داناینە، قوناغا ئێکێ بەری شەش سالان مە کامیرە دانابوونە مەمەران، پشتی سەرکەفتنێ، ئەڤ سالە پێشنیازا مە ئەو بوو بەرفرەھتر لێ بکەین و ب ھاریکاریا رێڤەبەرێ پەروەردێ، ب تنێ وەک تێست ٢٤ کامیران ل پۆلان و ل ھۆلێن تاقیکرنێ و مەمەران ھاتینە دانان و ھەتا نوکە ٣٢ کامیرە ھەنە و کار دکەن و تۆمار دکەن.
رێڤەبەرێ قوتابخانێ گۆت ژی: قوناغا ئێکێ ھەتا ٣ ملیۆن و نیڤان مەزاختیێ شەش کامیران بوو ل گەل تەلەڤزیۆن و ئامیران و قوناغا ئەڤ جارە ھەتا شەش ملیۆن و ھەتا ١٠ ملیۆن بۆ ھەر دو قوناغان ھاتینە مەزاختن.
رێڤەبەرێ مەمێ ئالان گۆت: مامۆستا ھایدارکرینە و ب تنێ بۆ چاڤدێریا قوتابیانە و نە چاڤدێریا مامۆستا و ھەتا نوکە قوتابی و مامۆستا درازینە، ١٠٠% ئاریشێن مە ھاتینە چارەسەرکرن، رێزگرتنەکا باش د ناڤبەرا مامۆستا و قوتابیان دا ھاتینەچێکرن.
سەمیر عەبدولعەزیز رێڤەبەرێ پەروەردا دھۆک یا رۆژھەلات دیار کر، ھەتا ٧٠% مە کامیرە ل چەندین جھێن قوتابخانان داناینە وەک مەمەرا، فرۆشگە و گۆرەپان، ئەڤە پێنگاڤا ئێکێ یە و پێنگاڤا دویێ کامیرە دێ د پۆلان دا ھێنە دانان و مامۆستا و تەختێ نڤسینێ نادەرکەڤیت و ب تنێ قوتابی دێ دەرکەڤیت بۆ کونترۆلکرنا پولێ یە و دووڤچوونا قوتابیانە.
رێڤەبەرێ پەروەردێ گۆت: چو بریارێن وەزارەتێ نەھاتینە بۆ دانانا کامیران و ئەڤە بۆ بەرژەوەندیا گشتیە و نە بۆ چاڤدێریا مامۆستایانە ل پولێ و مە رێز بۆ ھەنە و خودان شیان و گۆت: ب چو رەنگان نابیت کامیرە بۆ چاڤدێریا مامۆستایان بھێنە بکارئینان.
عومەر ئەحمەد قاسم، رێڤەبەرێ پەروەردا دھۆک یا رۆژئاڤا گۆت: مە چو بەرنامە بۆ دانانا کامیران ل قوتابخانان نینن، چونکە کاودانێن ئەڤرۆ یێن ئابووری ل کوردستانێ ڤێ چەندێ ناخوازن و تشتێ پێدڤیتر ھەیە ل قوتابخانان پێدڤیە بھێتە ئەنجامدان، نوکە ئاریشە پەروەردا مە تەختێن رونشتنێ نین و ئەگەر رێڤەبەر تەختێن رونشتنێ بکریت گەلەک باشترە و گرنگترە ژ کامیران، چونکو کامیرە تشتەکێ لاوەکی یە، نوکە پێدڤیە ژینگەھا قوتابخانێ بھێتە ژێخستن و ئارامکرن و وانە ب باشی تێدا بھێنە گۆتن.
رێڤەبەرێ پەروەردا رۆژئاڤا گۆت: ب پارێ حانوتان رێڤەبەرێ قوتابخانێ دەستھەلات ھەیە کامیران بدانیتە قوتابخانێ و ھندەکان داناینە و ب تنێ ل مەمەرا و ل دەرڤە و ل گۆرەپانێ و ئەڤە ژ بەر کاودانێن تەناھیێ ژ دەرڤەیی قوتابخانێ، ھەتا ھۆلێن تاقیکرنێ ژی کامیرە ھاتینە دانان.
عومەر ئەحمەد قاسم ئاشکرا کر کو د چو پۆلان دا کامیرە نەھاتینە دانان و ل گەل دا نینە کامیرە ل پۆلان بھێنە دانان و گۆت: ھەر رێڤەبەرەکێ پۆلێ بکەتە کامیرە دڤێت رازیبوونا پەروەردێ و مامۆستایێن خوە وەربگریت.
عەبدوللا حەسەن رێڤەبەرێ پەروەردا سێمێلێ گۆت: ل گەل دانانا کامیران نینم د ناڤ پولێ دا، ھەتا ھەبیت ژی، ب تنێ دەمێ بھێنڤەدانا یا ڤەکری بیت و بلا مە باوەری ب مامۆستایێ خوە ھەبیت.
عەبدولا حەسەن رێڤەبەرێ پەروەردا سێمێلێ گۆتژی: کامیرە ل گۆرەپانێ و مومەرا ، فرۆشگەھێ ھەبیت کارەکێ جوان و شارستانی یە و باشە، قوتابی بزانیت چاڤدێری ل سەر ھەیە، کامیرە ل چەندین قوتاخانێن سێمێلێ ھاتینەدانان و مفا ژ دانانێ ھاتیە وەرگرتن.
ئەحمەد گەرمیانی جێگرێ سەرۆکێ ئێکەتیا مامۆستایێن کوردستانێ خویا کر، ھایدار نینین ل پەروەردێن ھەولێر و سلێمانیێ کامیرە ل قوتابخانان ھاتبنە دانان و ل پەروەردا دھۆک ژی ژ نوو مە زانی و دانانا کامیران ب چو رەنگ و شێوازان نابیت ل پۆلان دا بیت و مامۆستا د گۆتنا وانێ دا نەیێ ئارام بیت و رێڤەبەریا قوتابخانێ چاڤدێریێ لێ بکەت و مامۆستا ژ ڤێ چەندێ مەزنترە.
گەرمیانی ئاشکرا کر ژی کو بابەتێ دانانا کامیران ل پۆلان دا ل پەروەردێن دھۆک دێ گەھینینە جەنابێ وەزیرێ پەروەردێ و دیسان کۆمبوونا سکرتاریەتا ئێکەتیا مامۆستایێن کوردستانێ دێ ھێتە گەنگەشەکرن و دێ ھێتە رەتکرن.