بەردەڕەش بۆ دەربازبوونێ و شێلادزێ بۆ مانا خوە دێ شەڕی كەن
قەیس وەیس:
چاڤەڕێ یە ئەڤرۆ هەردو نوونەرێن پارێزگەها دهۆكێ تیما یانەیا بەردەڕەش و شێلادزێ یاریێن خوە یێن گەڕا نەهێ و دووماهیێ ژ چارچووڤەیێ كۆما دویێ یا خولا پلا دو دەربازبوون بۆ پلا ئێكا كوردستانێ یا فوتبۆلێ بكەن ئەوا 16 یانەیێن هەرێمێ پشكدارن و هەر كۆمەكێ دو تیمێن رێزێن ئێكێ و دویێ دێ دەربازبنە قۆناغا چارگۆشەیا زێرین و دو یانەیێن قارەمان و یا دویێ دێ بۆ پلا ئێك هێنە دەربازكرن.
د كۆما دویێ دا یانەیا بەردەڕەش بەرانبەر دەستكەفتەكێ دیرۆكی یە ژبۆ دەربازبوونێ و ئەركەكێ زەحمەت دایە ئەوا ئەڤرۆ دێ ل یاریگەها دویێ یا شەهید فرانسۆ حەریری بیتە مێڤانا یانەیا زانكۆیا جیهان، یانەیا پارێزگەهێ خودانا 13 خال رێزا دویێ دهێت و هیڤیێن پلێتا دەربازبوونێ ژ دەست نە داینە، لێ دێ بەرانبەر تیما زانكۆیا جیهان راوەستیێت ئەوا ب 14 خالان سەرێ لیستێ دهێت، یارییەكا ئاگرینە بۆ تیما بەردەڕەشێ و دڤێت ب سەركەڤیت ژبەركو هەردو یانەیێن مەخموور و خەلیفان ب 12 خالان رێزێن سێیێ و چارێ ل دویڤ ئێك دهێت و ئەوژی هەڤڕكێن دەربازبوونێ نە، تیما سنۆر ب نەهـ خالان رێزا پێنجێ دهێت.
ژلایەكێ دیڤە ئەركێ شێلادزێ ژی ب سانەهی نابیت و دیارییا ئەڤرۆ دا بەرانبەر خەلیفان ل یاریگەها وێ دڤێت ب سێ خالان ڤەگەڕیت ژبۆ پاراستنا مانا خوە د خولێ، تیما شێلادزێ نوونەرا دویێ یا پارێزگەهێ دڤێ كۆمێ دا ب هەشت خالان رێزا شەشێ دهێت، بەختیاری ب حەفت خالان، شارەزوو ب پێنج خال و حاجیاوا ب چار خالان رێزێن حەفتێ هەتا هەشتێ دهێن، ئانكو جو دەلیڤە بۆ خوسارەتیێ نابیت ژبۆ پاراستنا مانا خوە.