بەرپرسێ لقێ 22 یێ پارتی: ئێكڕێزیا ناڤمالا كوردی فاكتەرەكێ ب هێزە بۆ پێگەهێ كوردستانێ
ئەڤرۆ
عەزیز هەورامی:
ئەكرەم سالح، بەرپرسێ لقێ 22 یێ پارتی دیموكراتی كوردستان ل گەرمیان، ڕاگەهاند، ئێكڕێزیا ناڤمالا كوردی فاكتەرەكێ ب هێزە بۆ پێگەهێ كوردستانێ و هەر ناكۆكیەك ل هەرێما كوردستانێ دێ كاریگەریا نەرێنی هەبیت ل سەر پێگەهێ كوردان ل سەر ئاستێ ئیراقی و هەرێمایەتی و نێڤدەولەتی و گرنگە ئالیێن كوردستانێ ب گشتی هەست ب هەستیاریا ڕەوشا ڤێ قۆناغێ بكەن و ناكۆكی بهێنە چارەسەر كرن تاكو تاكو ژ ڤێ ڕەوشا ئیراق تێدا دەرباز دبیت و ئالیێن كوردستانێ ب كۆدەنگیێ ڕوو ب ڕوویێ ئاریشە و گرفتان بن.
ئەكرەم سالح، زێدەتر بۆ ڕۆژنامەیا (ئەڤرۆ) گوت» پرسا هەلبژارتنان بۆ دەمێ سالەكێ ژ ژڤانێ خوە هاتیە پاشئێخستن و هەتا نوكە قانوونا هەلبژارتنان نەهاتیە ڕاستڤەكرن و كۆمسیۆنا بلند یا هەلبژارتن و ڕاپرسیان ل هەرێمێ كوردستانێ نەهاتیە كاراكرن، هەكە هەلبژارتن ل ژڤانێ بۆ هاتیە دیاركرن نەهێنە ئەنجامدان دێ كاریگەریەكا خراب ل سەر ڕەوشا كوردستانێ هەبیت».
گوت ژی» ئەم وەكو پارتی ل دەف مە گرنگە هەلبژارتن د دەمێ خوە دا بهێنە ئەنجامدان، پرسا دیموكراسیێ و ئازادیێ و مافێن مرۆڤی بۆ كوردستانێ كاریگەریا گرنگ یا خوە هەیە ل ڕوانگەها دەولەتێن زلهێز و دۆست و هەڤپەیمانێن مە، هەموو ئالی هزر د بەرژەوەندیا تایبەت دا نەكەن، بەلكو بەرژەوەندیا گشتی و پاشەڕۆژا هەرێما كوردستانێ ل پێشتر بیت و بهانەیان نە ئینن ژبەر لاوازیا سیاسی تاكو هەلبژارتن نەهێنە ئەنجامدان، ژ بەر كو هەلبژارتن پرۆسەیەكا گرنگە و پێدڤیە د دەمێ خوە دا بهێنە ئەنجامدان».
هەروەسا گوت» پێدڤیە ل سەر هەموو ئالیان سەرۆكایەتیا هەرێما كوردستانێ و جڤاتا وەزیران بكەنە جهێ چارەسەركرنا كێشە و ئاریشەیێن كوردستانێ، نەكو سۆشیال میدیایێ و داخۆیانیێن لابەلا و پەنابرن بۆ نەحەزێن كوردستانێ، پێدڤیە كورد ل بەری هەموویان دۆستێن هەڤدو بن، نەكو چاڤەڕێی خەلكی دی بن چارەسەریێ بۆ بكەت».
خویاكر» هەموو دەمان دەرگەهێ پارتی یێ ڤەكری بوو بۆ دانوستاندنێ و چارەسەركرنا كێشەیان و چو جاران پارتی هۆكار نەبوو بۆ وێ چەندێ ڕەوشا سیاسی و حوكمڕانی ب وی ئاراستەیێ ئالۆز بچیت و مخابن ژ ئەگەرێ كۆمەكا گرفتان كو ل دەمێ بۆری دا رووداین و تیما ئێكەتیێ نەچوونە كۆمبوونێن جڤاتا وەزیران، پێدڤی بوو د چارچۆڤەیێ جڤاتا وەزیران دا كێشەیێن خوە چارەسەر كربان و داخوازیێن خوە بەرچاڤ كربان چونكە ئێكەتی ئالیەكێ سەرەكیێ حوكمەتا هەرێمێ یە، نوكە ژی دەلیڤە مایە و كێشە نەگەهشتینە وی ئاستی كو نەهێنە چارەسەركرن، نیەت پاكی و پێگیریكرن ب قانوون و بەرژەوەندیێن بلند یێ كوردستانێ وەدكەت كێشە ب شێوەیێ ئاسایی چارەسەر ببن».
ئاماژەكر» بزاڤ د بەردەوامن كو چارەسەری بۆ كێشەیان بهێنە دیتن و قۆناغا نوكە بهێتە دەربازكرن، بزاڤ ژی ل سەر ئاستێ هەڤپەیمان و ناڤخوە د بەردەوامن ب هیڤیا وێ چەندێ د دەمەكێ نێزیك دا كۆمبوونێن پارتی و ئێكەتیێ دەست پێ بكەن و بزاڤ بهێنە كرن چارەسەری بۆ وان خالێن بووینە جهێ ناكۆكیێ چارەسەریا گونجای بۆ بهێتە دیتن و هەلبژارتنێن پەرلەمانێ كوردستانێ بهێنە ئەنجامدان».
