بەرپرسەكێ وەزارەتا بازرگانی: چو راستی بۆ كێمكرنا بەهرا ئاهێن خوارنێ نینە
هەولێر، قائید میرۆ:
بەرپرسەكێ وەزارەتا بازرگانی رەتكر ئەرزاقێ مەهانە بهێتە كێمكرن و دبێژیت: ئەڤ سالە بێی ئاریشە ئەرزاق ل سەر وەلاتیان دهێتە بەلاڤكرن و عمبارێن وەزارەتێ ژی تژی ئەرزاقن بۆ بەلاڤكرنێ و هەتا نوكە سێ پشكێن ئاری هاتینە بەلاڤكرن.
حسێن سەبری، نوونەرێ وەزارەتا بازرگانیا هەرێمێ ل بەغدا بۆ رۆژناما ئەڤرۆ دیار كر، ئەو زانیاریێن ل تۆڕێن جڤاكی و دەزگەهێن راگەهاندنێ ل دۆر كێمكرنا بەهرا ئەرزاقێ مەهانە دهێنە بەلاڤكرن، چو راستی بۆ نینە و گۆت: «ئەرزاق نەهاتیە كێمكرن، بەلكو ئەو ئەرزاقێ زێدە یێ هەموو سالەكێ د مەها رەمەزانێ دهێتە زێدەكرن، پشتی رەمەزانێ دهێتە بڕین، هەرچەندە ل گەل سیستەمێ ب ئەلیكترۆنیكرنا فۆرمێن ئاهێن خوارنێ و بریكاران هندەك ئاریشە پەیدابووینە، بەلێ ئەو ژی دێ چارەسەر بن».
حسێن سەبری گۆتژی: «ئەڤ سالە رەوشا بەلاڤكرنا ئەرزاقێ مەهانە ل سەر وەلاتیان باشترە و هەتا نوكە سێ جاران ئار ل سەر وەلاتیان هاتیە بەلاڤكرن، ئەڤە د دەمەكی دایە، سالا بۆری هەتا ئەڤی دەمی ب تنێ دو جاران ئار هاتبوو بەلاڤكرن، نوكە عمبارێن وەزارەتا بازرگانی تژی ئەرزاقن و بێی ئاریشە دهێتە بەلاڤكرن».
