بەرپرسەکی پایەبلندێ ئیرانێ: چەندین وەلاتێن نوو دێ ل رۆژھەلاتا ناڤین ئاڤا بن
ئەڤرۆ:
سکرتێرێ جڤاتا دەستنیشان کرنا بەرژەوەندیێن کۆمارا ئیسلامی یا ئیرانێ دیار کریە کو ئەمریکا پلانەک بۆ دروست کرنا چەندین وەلاتیێن نوو ل رۆژھەلاتا ناڤین دانایە و ل گۆر وێ پلانێ دێ ل عیراقێ دو دەولەتێن نوو ئاڤا ببن و سووریێ و یەمەن ژی دێ ھێنە پارچەکرن و ل سعوودیێ و ھندەک وەلاتیێن دی ژی دێ ئالۆزیێن مەزن دروست ببن و رەنگە پارچەبوون ل وان وەلاتان ژی دروست ببیت و ژ بەر وێ یەکێ ژی ھەتا بیست سالن دی رەوشا رۆژھەلاتا ناڤین ئارام نابیت.
محسن رزایی سکرتێرێ گشتیێ جڤاتا دەستنیشان کرنا بەرژەوەندیێن کۆمارا ئیسلامی یا ئیرانێ بۆ ئاژانسا مێھر یا ئیرانێ راگەھاند کو ئەمریکا پلانەک ئامادە کریە و دخوازیت رۆژھەلاتا ناڤین پارچە پارچە بکەت، چونکو ئەو دبینن د رەوشا نھا دا بەرژەوەندیێن وان د مەترسیێ دانە و ژ بەر ھندێ ژی بەرنامەکا مەزن بۆ ئاڤاکرنا چەندین وەلاتیێن نوو ل رۆژھەلاتا ناڤین ھاتیە دارێتن و گۆت: (ل گۆر بەرنامێ ئەمریکا دێ عیراق ل بیتە سێ پارچە و دێ دەولەتا کوردی ژی ھێتە ئاڤاکرن، ھەروەسا دێ دو دەولەت ل سووریێ ژی ئاڤا بن و یەمەن ژی دێ ھێتە پارچەکرن و دو دەولەتێن جودا جودا دێ ژێ دروست ببن و کاریگەریا وێ بەرنامێ دێ ل سەر سعوودیێ و ھندەک وەلاتێن دی ژی ھەبیت و ژ بەر ھندێ ژی دڤێت ئیران ل ھەمبەر وی بەرنامەیی گەلەک ھشیار بیت و سیاسەتەکا راست برێڤە ببەت).
ناڤھاتی د بەردەوامیا ئاخڤتنا خوە دا ئەو یەک ژی دیار کریە کو ئەمریکا بێی چو وەلاتەکی ھەرێمی ل سەر بەرنامێ خوە کار دکەت و تورکیا و سعوودیە کو وەک ھەڤپەیمانێن ئەمریکا دھێنە دیتن د وی بەرنامەیی دا چو رۆلێ وان نینە، چونکو ئەمریکا دخوازیت وەلاتێن بێ ھێز و بچووک ل دەڤەرا مە بھێنە ئاڤاکرن دا ئەو بشێن ب دلێ خوە کۆنترۆلێ ل سەر رۆژھەلاتا ناڤین بکەن، وان نەڤێت چو وەلاتەکی ب ھێز ل دەڤەرێ بمینیت و ئاڤاکرنا ھەفت وەلاتان ژی بۆ ھندێ یە و گۆت: (ئاڤاکرنا چەندین وەلاتان و پارچەکرنا سێ وەلاتێن مەزن یێن وەک سووریە، عیراق و یەمەنێ کارەکی گەلەک مەترسیدارە و دێ ببیتە ئەگەر کو شەرێ ناڤبەرا پێکھاتێن جودا جودا ل رۆژھەلاتا ناڤین بەرفرەھتر بیت، ئەمریکا ناخوازیت ئارامی ل دەڤەرا مە دا ھەبیت و ھەکەر پلانا وان سەرکەڤیت ھەتا سی سالێن دی دەڤەرا مە ئارام نابیت و ژ بەر ھندێ دڤێت خەلکێ موسولمان رێ نەدەن ئەمریکا وەلاتێ وان پارچە بکەت).
د. عەلیرزا حکمەتی مامۆستایێ زانستێن سیاسی ل ئەمریکا ژی ل سەر مالپەرێ جڤاکی یێ فەیسبووکێ دیار کر کو ئیران بزاڤێ دکەت کو بەرژەوەندیێن ھەڤپشک د ناڤبەرا خوە و ئەمریکا دا زێدەتر بکەت دا بەرنامێ ئەمریکا چ مەترسیێن مەزن ل سەر پاشەرۆژا ئیرانێ دروست نەکەت، رۆحانی زوو ھەست ب وێ یەکێ کر و ژ بەر ھندێ ژی ئیران رژدە ل گەل ئەمریکا دانوستاندنان بکەت دا بشێت ئاریشێن خوە چارە بکەت، چونکو ھەکە ھات و چەند وەلاتێن نوو ل رۆژھەلاتا ناڤین ئاڤا ببن ئەو یەک دێ ببیتە ئەگەرێ پارچەبوونا ئیرانێ، چونکو ب سالانە دەستھەلاتا سیاسی یا ئیرانێ زۆرداریێ ل کێم نەتەوە و نەتەوێن دی ل ئیرانێ دکەت و ئەو ژی دێ د رەوشەکا وەسا دا داخوازا ئاڤاکرنا ھەرێم یان ژی دەولەتەکی سەربخوە بکەن.
