بەرپرسەکێ ئاسایشێ: ئەردێ کوردان ل کەرکووکێ دھێتە داگیرکرن
ھەولێر، قائید میرۆ:
پێلەکا تەعریبێ دەڤەرێن پارێزگەھا کەرکووکێ ڤەگرتیە و بەرپرسەکێ ئاسایشا کەرکووکێ ژی دبێژیت: ب ھزاران خێزانێن عەرەب ل دەڤەرێن جودایێن عیراقێ ھاتینە کەرکووکێ و دخوازن کورد ئەردێ خوە بۆ وانا بجە بھێلن.
نەقیب گۆران عەبدوللا، بەرپرسێ راگەھاندنا ئاسایشا کەرکووکێ بۆ رۆژناما ئەڤرۆ گۆت: “ب ھزاران خێزانێن عەرەب ل دەڤەرێن جودایێن عیراقێ ژ لایێ دەستھەلاتا کەرکووکێ ڤە ھاتینە ڤەگوھاستن بۆ سەر ئەردێ کوردان ل کەرکووکێ، نوکە ب ھزاران دۆنەمێن ئەردێ کوردان و ب دەھان کورد ل بن مەترسیا داگیرکرنێ نە، ل ھەموو دەڤەرێن کەرکووکێ بزاڤێن تەعریبێ دەستپێکرینە و حەفتیا بۆری ھژمارەکا وەلاتیێن عەرەب ل دەڤەرا تالەبانی یا قەزا داقووق ب چەکی ھێرش کرە سەر وەلاتیێن کورد و دڤیان جۆتیارێن کورد ئەردێ خوە نەکێلن و بۆ وانا بجە بھێلن”.
نەقیب گۆران عەبدوللای خویا کر کو نوکە پیلانەکا مەترسیدار یا بڕێڤەدچیت بۆ ڤی ئەردێ کوردان کو بھێتە داگیرکرن و کورد ل سەر ئەردێ وان بھێنە راکرن و گۆت: “ئەڤە د دەمەکی دایە، عەرەبێن ب تەعریبێ ھاتینە کەرکووکێ بەری چەند سالان د چارچوڤێ مادێ 140 یێ دستوورێ عیراقێ دا ھاتینە قەرەبووکرن و پارێ خوە وەرگرتیە و پشتی روودانێن 16ی ئۆکتۆبەرێ جارەکا دی ڤەگەڕیاینە کەرکووکێ”.
