بەرپرسەکێ ئەمریکی ل دۆر پێشمەرگەی و دەولەتا کوردی ئاخڤتنێن گرنگ دبێژیت
ئەڤرۆ نیوز:
د ناڤ ھۆلا کۆنگرێسێ ئەمریکی دا سەرۆکێ ئەرکانێن لەشکرێ ئەمریکی بۆ ئەندامێن کونگرێسی بەحسێ ھێزێن پێشمەرگەی و دەولەتا کوردی دکەت و دبێژیت پێشمەرگە کاریگەرترێن ھێزا ل سەر ئەردی یە ل عیراقێ و سووریێ و کورد دبەرھەڤن بۆ دامەزراندنا دەولەتا خوە.
ئێک ژ ئەندامێن کۆنگرێسی د روونشتنێ دا ل دووڤ باسنیۆز دبێژیت” ئیدارا ئەمریکی بۆ کۆنگرێسی یا دیارکری کو د بەرھەڤن کوردان پڕچەک بکەن، من ژ مێژە ئەڤ داخوازیە دکر”.
جۆزێف دانفۆرد کو ل شوینا (مارتن دیمبسی) بوویە سەرۆکێ دەستەیا ئەرکانێن لەشکرێ ئەمریکی ل دۆر کوردان و پێشمەرگەی و دەولەتا کوردی ئاخڤتنێن گرنگ دبێژیت.
ل دۆر دەولەتا کوردی، دبێژیت” دشیاندایە عیراق بھێتە پارچەکرن و ببیتە دو پارچە، پارچا کوردی و پارچا شیعی، ب دیتنا من دەلیڤە بۆ دروستبوونا دەولەتەکا سونی نابیت” ھەروەسا دبێژیت” کورد ھێزا ھەرە مەزن و کاریگەرن ل سەر ئەردی ل عیراقێ و سووریێ، ل ڤێ دووماھیێ مە دەست ب چەکدارکرن و مەشقدانا وان یا کری”.
ئەندامەکێ کۆنگرێسی ژ جۆزێفی دپرسیت” ئەرێ دشیاندایە ھەر ژ نوکە شیرەت ل سەرۆکێ ئەمریکی بھێتە کرن کو عیراقێ پارچە بکەت بۆ سێ دەولەتان، ل شوینا مانا وێ وەکو دەولەتەکا ئێکگرتی؟ سەرۆکێ ئەرکانێن لەشکرێ ئەمریکی د بەرسڤێ دا دبێژیت” ئەز دشێم پێشبینیا دامەزراندنا دو دەولەتان ل عیراقێ بکەم، بەلێ یا زەحمەتە بشێن سێ دەولەتێن سەربخوە دروست بکەین، چونکی چو داھاتیەک ل دەڤەرێن سونی نینە، ھەکە عیراق ببیتە سێ دەولەت، بێ ھەبوونا دەولەتەکا ناڤەند، دێ گەلەک یا ب زەحمەت بیت”.
ئەو سیناتۆرە ژێ دپرسیت “تو دانپێدانێ ب وێ چەندێ دکەی کو کورد ب ھێزن و د بەرھەڤن بۆ وی ئەگەری ھەکە دەلیڤە پەیدابوو؟” سەرۆکێ ئەرکانێن ئەمریکی دبێژیتێ” ب دیتنا من تنێ ھەکە سەحکەینە داھاتیان و شیانێن حوکڕانیێ، بێگۆمان کورد و شیعە گەلەک د بەرھەڤن بۆ دروستکرنا دەولەتا سەربخوە دڤی دەمی دا”.
سیناتۆرەکێ دی پرسیار لێ دکەت” دڤان رۆژان دا، ئیدارا ئەمریکی کۆنگرێس یێ ئاگەھدارکری کو دێ چەکی ددەتە کوردان، دەمەکێ درێژە من ئەو داخوازی دکر، ئایا ئەو چەک دێ گەھنە پێشمەرگەی، یان دێ بەغدا رێگریان بۆ دروست کەت؟” ئەوژی ب ڤی ڕەنگی بەرسڤێ ددەت” پێشمەرگە کاریگەرترین ھێزا ئەردی یە ل عیراقێ و سووریێ، یا ئەز دزانم ئەو خالێن جھێ ناکۆکیێ بوون ل دۆر پڕچەککرنا کوردان یێن ھاتینە چارەکرن، لەوما نوکە دێ ھاریکاریێن دراڤی گەھنێ و مەشق راھێنان پێ ھێنە کرن و ئەز ب خوە دێ سەرەدانا کوردستانێ کەم”.