بەرپرسەکێ پارتی: بەری نوکە بزاڤێن کۆدەتایەکێ ھەبوون و پارتی شیا ژناڤ ببەت
ھەولێر، قائید میرۆ
بەلافکرنا پڕۆپاگندەیێن ھندەک دەزگەھێن راگەھاندنێ ل دۆر شکاندنا تیرۆرستێن داعشێ کارڤەدان پەیداکرینە و خەللکێ ھەرێما کوردستانێ ئاماژە ب وێ چەندێ دکەن سەرۆک بارزانی رۆلەکێ سەرەکی ھەبوویە بۆ سەرپەرشتیکرنا ھێزێن پێشمەرگەی بۆ بەرھنگاریا چەکدارێن داعشێ و بەرپرسەکێ پارتی ژی دبێژیت، پڕۆپاگندەیێن ھاتینە بەلاڤکرن دەستێن دەرەکی ل پشت ھەنە و دچارچوڤێ ڤێ پیلانێ یە بۆ لاوازکرنا ھەرێما کوردستانێ.
کامەران غەریب، کارگێڕێ لقێ چارێ پارتی دیموکراتی کوردستان بۆ رۆژناما ئەڤرۆ گۆت” دیارە بەلاڤکرنا وان پڕۆپاگندەیان پڕۆسەیەکا بەردەوامە، دەمێ شەرێ داعشێ دەستپێکری و مووچە و بودجێ خەلکێ کوردستانێ ھاتیە برین، چەندین پیلان ھاتینە دارێشتن دژی ھەرێما کوردستانێ، چونکە یێن دژی پارتی ژی ھەر دژی ھەرێما کوردستانێ نە، ھەتا رێگری ل رێککەفتنا د ناڤبەرا ھەرێما کوردستانێ و بەغدا ژی دھێتەکرن، مخابن ھندەک ھێزێن سیاسی و پەرلەمانتارێن کورد ژی پشکدارن د ڤان پیلانێن دژی ھەرێما کوردستانێ دا، ئەم وەسا دبینین ئەف ھەموو پیلان و دژایەتیا دھێتەکرن، ئانکو پارتی یا بھێزە و د سەنگەرێ پێشیێ یە بۆ بەڕەڤانیکرنێ ل خەلکێ کوردستانێ، لەوڕا ژی سەرۆک بارزانی و ھێزێن پێشمەرگەی دکەنە ئارمانج، کو رەمزا بەرگریێ بووینە ل ئەرد و خەلکێ کوردستانێ کو خەلکەک دخوازیت پیرۆزیێن مە نەشیرین بکەت”.
ڤی بەرپرسێ پارتی ل سلێمانیێ ئاماژەکر” ژمێژەیە لایەن و کەسایەتیێن دژی ھەرێما کوردستانێ بزاڤان بۆ لاوازکرنا کوردان دکەن، باشترین رێک ژی ھەتا کورد ئێخسیر ببن دخوازن کوردان چو پیرۆزی نەبن، سەرکردە و رێبەرێن کورد یێن بۆ ئارمانجێن کوردان خەباتێ دکەن پیلان ھەنە مەزناھیا وان سەرکردە و رێبەرێن کورد کێم بکەن”.
کامەران غەریب گوت ژی” دژایەتیا ھەرێما کوردستانێ یا دھێتەکرن، خوەنیشادانێن ل ھەیڤا بۆری ژی ھاتینە ئەنجامدان دەستێن دەرەکی و ھندەک لایەنێن ناڤخوە تێدا ھەبوون و مەرەم ژ وان ئالۆزیان ئەنجامدانا جورەکێ کۆدەتایێ بوویە ل ھەرێما کوردستانێ، لەوڕا ژی بارەگایێن پارتی ل سلێمانی و ھەلەبجە کەفتنە بەر ھێرشێن خەلکەکی، بەلێ پارتی ب ژیرانە بەرھنگاری وان پیلانان بوو، چونکە ڤیایە پارتی راکێشن بۆ شەڕەکێ ناڤخوە، ئەڤە د دەمەکی دایە کو پارتی شەرێ ناڤخوە حەرام کریە، بەلێ پارتی ب شارەزایانە شیا وان پیلانان بشکێنیت”.
