بەرپرسەکێ پارتی: حەشد شەعبی بزاڤا جوداکرنا سەعدیە ژ کوردستانێ دکەت
ئەڤرۆ:
بەرپرسەکێ پارتی دیموکراتی کوردستان ل خانەقینێ راگەھاند، بریاربوو دوھی ٢٠ خزیرانێ نێزیکی ٢٣٥ خێزانێن ئاوارە بزڤرنە مالیچن خوە ل ناحیا سەعدیە، بەلێ ژلایێ حەشد شەعبی ڤە رێگری ل وان خێزانان ھاتە گرتن و دەرفەت نەدایێ بزڤرنە مالێن خوە ب بەھانەیا وێ چەندێ کو بێ پرس کرن ب حەشد شەعبی یێن زڤرین.
شێخ جەعفەر شێخ مستەفا بەرپرسێ لقێ پارتی دیموکراتی کوردستان ل خانەقینێ بۆ مالپەرێ فەرمیێ پارتی دیموکراتی کوردستان گوت” ل رۆژا ١٩ ڤێ مەھێ لیستەکا ٢٣٥ خێزانێن کورد یێن ئاوارە ھاتە بەرھەڤکرن بۆ وێ چەندێ کو دوھی ٢٠ خزیرانێ ئەو خێزانە بزڤرن مالێن خوە ل ناحیا سەعدیە و دوھی سپێدی رێڤەبەرێ ناحیا سەعدیە ل گەل وان چو بۆ وێ چەندێ دا بزڤرن، بەلێ ژلایێ خالا پشکنینێ یا سەر ب حەشد شەعبی ڤە رێگری لێ ھاتە کرن و دەرفەت نەدایێ بزڤرن جھێن خوە، لەوما جارەکادی پشکەک ژ وان ئاواران زڤرینە خانەقینێ”.
بەرپرسێ لقێ پارتی دیموکراتی کوردستان ل خانەقینێ زێدەتر گوت” بھانەیا حەشد شەعبی بۆ پێرابوونا وان ل گەل خێزانێن ئاوارە یێن کورد ئەنجامدای ئەوبوو کو بێ پرسا وان یێن زڤرین و نابیت بێ پرسا وان بزڤرن”.
شێخ جەعفەری خۆیاکر ژی” ئەڤە پێشھاتەکا مەترسیدارە و ژبلی وێ چەندێ نوکە حەشد شەعبی یا خەندەقەکێ ل دەوروبەرێن سەعدیە لێددەن ب بەھانەیا وێ چەندێ کو یێ بزاڤا راگرتنا بارێ ئەمنی دکەن، لێ ب راستی ئەڤە جوداکرنا سەعدیە یە ژ دەڤەرێ”.
