بەرپرسەکێ کورد ل مووسل بەحس ل رزگارکرنا مووسل دکەت
ئه‌ڤرۆ:
غەیاس سورچی، کارگێرێ مەلبەندێ ئێکەتی نیشتیمانی کوردستان ل مووسل بۆ رۆژناما ئەڤرۆ دیارکر، چو مەبەست ل پشت رزگارکرنا شنگالێ نینن و گۆت” مەرەم ژ گیرۆبوونا رزگارکرنا قەزا شنگالێ بۆ وێ چەندێ ڤەدگەڕیت کو ھەموو دەڤەر ژلایێ چەکدارێن داعش ڤە یێن ھاتینە بۆمبڕێژکرن و نۆک باشیکێ ساناھیترین باژێڕە بھێتە کۆنتڕۆلکرن و بەردەوام ژلایێ فڕۆکەیێن ھەڤپەیمانان ڤە دھێتە بۆمبەبارانکرن، بەلێ ژ بەر (تی ئێن تی) و بۆمبڕێژکرنێ پێشمەرگە نەشێت بچیتە پێش، یا شنگالێ ژی راستە ژ مێژە بەحسێ پلانا رزگارکرنا شنگالێ دھێتەکرن، بەلێ مە دڤێت شنگال ب کێمترین زیان بھێتە ئازادکرن، چونکی دەڤەرەکا بەرفرەھە و پلانەکا توکمە پێدڤیە، تنێ پلانەک یا ھەی بۆ دەمەکێ نێزیک ئەوژی شکاندنا دۆرپێچا ل سەر چیایێ شنگالێ یە و ل دەمەکێ گەلەک نێزیک دێ دۆرپێچا ل سەر چیایێ شنگالێ ھێتە شکاندن و نۆکە رەوشا وەلاتیێن سەر چیایێ شنگالێ ژبەر رەوشا سەقای گەلەک یا خراپە و ئەڤە بۆ دەمێ حەفتیەکێ یە فڕۆکەیان چو ھەڤکاری نەگەھاندینە چیایێ شنگالێ”.
ل دۆر پشکداریا پێشمەرگەی د رزگارکرنا مووسلێ دا، سورچی گۆت” نۆکە بەرھەڤی یێن دھێنەکرن بۆ رزگارکرنا مووسلێ و ل دو سەربازگەھان نێزیکی ١٠ ھزار پۆلیس و ھێزێن ئەمنی یێ مەشق و راھێنانان دکەن و پلان یا دھێتە بەرھەڤکرن، بەلێ ژ بەر کو ئەز یێ نێزیکم ژ ناڤەندێن بڕیارێن سیاسی، ھەتا نۆکە چو بڕیار نینن کو ھێزێن پێشمەرگەی پشکداریێ د ئازادکرنا مووسل دا بکەت، بەلکو تنێ دێ ژلایێ لوجستی ڤە ھاریکاریا سوپایێ عیراقێ و پۆلیسان کەن، ئەوژی پێشمەرگە دێ ھێزەکا پشتەڤانیێ بیت بۆ لەشکرێ عیراقێ و ب رێیا چەکێن خوە یێن گران، ھەروەسا بریندارێن وان دێ ئینن ھەرێما کوردستانێ و دڤێت ھەرێم رازیببیت ب رێیا ھەرێما کوردستانێ ھێرش ل سەر مووسل بھێتەکرن، چونکی چو رێیێن دی نینن و رێیا سامەڕا و بێجی ھەتا نۆکە لەشکرێ عیراقێ پاقژنەکریە، لەوما ھەکە پلانا رزگارکرنا مووسل بڕێڤەچوو، ئەڤە دێ لەشکرێ عیراقێ ژلایێ رۆژھەلات و باکورێ باژێڕی چیتە دناڤ مووسل دا ، بەلێ بێگومان تنێ دێ ئەڤ ھەڤکاریە بیت و چو بڕیار بۆ پێشمەرگەی نەھاتینە ھەتا نوکە ل گەل لەشکرێ عیراقێ بچنە ناڤا مووسل، تنێ ھەماھەنگی ھەیە، بتایبەتی پشتی رێککەفتنا ھەولێرێ و بەغدا پتر ئەم یێن نێزیکی ئێک دبین”.
غەیاسی دیارکر، داعش گەلەک یا لاواز دبیت ل سنوورێ مووسل و خەلکێ باژێڕی یێ بێزارە ژ حوکمێ خیلافەتا وان، رۆژ نینە شەڕ چێنەبیت و خەلکی نەگرن و نە کوژن، نۆکە ل گۆرەی پێزانینێن مە یێن دروست ١٥ ھزار چەکدارێن داعش ل مووسل یێن ھەین و نێزیکی چارسەد ژوانا کوردن، ب دیتنا من دێ پلانا رزگارکرنا مووسل یا ب زەحمەت بیت و شەڕەکێ مەزن دێ چێبیت کو دێ ژ شەڕێ کۆبانێ خراپتر بیت، ژ بەر کو کۆبانێ ھەموو کورد بوون و باشتربوو ژ مووسل، بەلێ شەڕێ مووسل دێ گەلەک یێ دژوارتربیت ژ بەرخۆدانا کۆبانێ و زیانێن مەزن دێ ھەبن ژ بەر کو تیرۆرستێن داعش مووسل بھوست بھوست یا بۆمبڕێژکری و ب دەھان سالێن دی ناھێتە پاقژکرن ژ وان بۆمبرێژان.
