بەری جەژنا رەمەزانێ هەمی زیاندارێن لەهیێن دهۆكێ دێ هێنە قەرەبووكرن
دهۆك، لەزگین جۆقی:
د بەردەوامیا هەوا قەرەبووكرنا زیاندارێن لەهیێن باژێرێ دهۆكێ دا، كو ژ لایێ حكومەتا هەرێما كوردستانێ ڤە دهێنە قەرەبووكرن، د. عەلی تەتەر، پارێزگارێ دهۆكێ دوهی 26/3/2024 پێشوازی ل موسا ئەحمەد، سەرۆكێ دەزگەهێ خێرخوازیێ بارزانی یێ نیڤدەولەتی و شاندەكێ بەنكا FIB كر و د هەڤدیتنەكێ دا باس ل پشكداریا بانكا ناڤبری و هەوا راگەهاندنا تۆرا میدیایی یا وار تیڤی و ئەو داهاتێ بۆ زیانڤێكەفتیان هاتیە كۆمكرن هاتە كرن و بڕیار هاتەدان هەر ئەڤرۆ پشكەكا دی یا قەرەبوویان بگەهیت.
پارێزگارێ دهۆكێ د كۆنگرەكێ رۆژنامەڤانی دا سۆپاسیا دەزگەهێ خێرخوازیێ بارزانی یێ نیڤدەولەتی و بانكا FIB و تورا میدیایی یا وار كر، كو گوژمێ ملیارەك و 456 ملیۆن دیناران رادەستی لژنا بلندا قەرەبووكرنا زیانڤێكەفتیان كرن و دۆپاتكر د ڤان دو رۆژێن بهێن دا هەمی مال دێ هێنە قەرەبووكرن.
ئیسماعیل محەمەد ئەحمەد، دەڤەردارێ دهۆكێ دیار كر، هەتا بەری جەژنا رەمەزانێ هەمی زیانڤێكەفتیێن لەهیان ل دهۆكێ دێ هێنە قەرەبووكرن.
