بەشیر بەرۆشکی: ب تنێ دانانا سیستەمەکێ دروست قەیرانێ چارە دکەت
ئەڤرۆ نيوز:
بەشیر بەرۆشکی، بەربژارێ ژمارە 8 ل سەر لیستا 183 یا پارتی دیمۆکراتی کوردستان بۆ ئەڤرۆ دیار کر، مە گەلەک ئارمانج و ھیڤی ھەنە بۆ ھندێ کوردستان ھەر یا ئاڤەدان بیت و دێ کارکەین بۆ نەھێلانا گەندەلیێ و چەسپاندنا دادپەروەریێ و سیستەمکرنا وەلاتی و پەرلەمان جھێ یاسادانانێ و چاڤدێریکرنا دەستھەلاتا جێبەجێکارە و ئەگەر ھەموو کار د جھێ خوە دا و ب قانوونی برێڤەبچن، دێ بیتە ئەگەرێ نەمانا قەیرانان و دێ ھەول دەین دەلیڤێن کاری بۆ گەنجان پەیدا بکەین و گۆت: دەلیڤێ کاری نە ب تنێ بۆ ھندێ بن مۆچەی وەربگرن، بەلکو ژ بۆ ھندێ بیت گەنج ببیتە بەرھەمھێنەر و داھێنانێ د وەلاتی دا بکەن.
ھەروەسا دیار کر، د شەرێ دژی داعشێ دا مە وەکو پێشمەرگەکی چەک ھەلگرتیە و مل ب ملێ پێشمەرگەی مە بەرەڤانی ژ ئاخا کوردستانێ کریە و کا چاوا پێشمەرگە بوویمە، ھوسا دێ ل پەرلەمانی ژی پێشمەرگەبم و بەرەڤانیێ ژ مافێن تاکە کەسان کەم و گۆت: ئەز وەکو کەس گەلەک خەمخۆرێ پرسێن نەتەوەیی مە و ئەگەر مرۆڤ 50 سالان ل وەلاتەکی بژیت ھەر مێھڤانە و وەلاتێ مرۆڤی ھەر چونەبیت ناسناما مرۆڤی یە، چونکو رووبارێن خوونێ بۆ وەلاتێ مە ھاتینە رشتن و پێدڤیە ئەڤ خوونە ب ھەروە نەچیت و ئەم بەرەڤانیێ ژێ بکەین.
بەشیر بەرۆشکی، ل سالا 1962 ل گۆندێ بەرۆشکێ ھاتیە سەر دونیایێ، خواندنا سەرەتایی ل گۆندێ بەرۆشکێ و دواناڤنجی و ئامادەیی ل ئامادەیا برایەتی و مانگێشکێ ب دووماھی ئیناینە. ل سالا 1981 پەیمانگەھا ماموستایان ب دووماھی ئینایە، ماوێ حەفت سالان وەکو ماموستا کارکریە و بۆ ماوێ 10 سالان ل ئەورۆپا ژیایە و د ڤی ماوێ دا وەکو سەرۆکێ کۆمەلا کوردستانێ بوویمە ل باکوورێ سوێد بۆ دوو خۆلان و ل سالا باوەرناما بەکالوریوس ب یاسایێ ل پارێزگەھا دھۆکێ وەرگرتیە و بۆ ماوێ 40 سالانە ئەندامێ پارتی دیمۆکراتی کوردستانە و نھا ئەندامێ لقا ئێک و بەرپرسێ لیژنا دوبان یا پارتی دیمۆکراتی کوردستانە و کاندیدێ ژمارە 8 ل سەر لیستا 183 یا پارتی دیمۆکراتی کوردستانە.
