بەغدا ب مەرەما گوهۆڕینا دیمۆگرافییا شنگالێ بڕیارا دائێخستنا كەمپان دابوو
دهۆك ،لەزگین جوقی
رێڤەبەرێ كۆچ و كۆچبەران و بەرسڤدانا قەیرانان ل ئیدارەیا سەربەخۆیا زاخۆ راگەهاند؛ حوكمەتا ئیراقێ بێی ڕاوێژ ل گەل حوكمەتا هەرێما كوردستانێ، بڕیارا دائێخستنا كەمپێن ئاوارەیان دابوو، كو مەرەم ژێ ب دیاریكری گۆهۆڕینا دیمۆگرافییا دەڤەرا شنگالێ بوو.
قاسم عەونی، رێڤەبەرێ كۆچ و كۆچبەران و بەرسڤدانا قەیرانان ل ئیدارەیا سەربەخۆیا زاخۆ گۆت: «بڕیارا دائێخستنا كەمپێن ئاوارەیان ژ ئالیێ بەغدایێ ڤە، پلانەك بوو بۆ گوهۆڕینا دیمۆگرافییا شنگالێ و داگیركرنا جهێن ئاكنجیبوونا ئاوارەیان، داكو خەلك نەشێت ڤەگەریتە سەر مالێن خۆ. لێ ب بزاڤ و پشتەڤانییا حوكمەتا هەرێما كوردستانێ و سەرۆكێ حوكمەتێ، شاندێن بلند چوونە بەغدا و شیان وێ بڕیارا سیاسی هەلوەشینن.»
ژ ئالیێ خۆ ڤە، پیر دەیان، رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ ئاماژە ب وێ چەندێ كر كو هەتا نوكە 20 كەمپ ل دهۆكێ و زاخۆ ماینە، كو پێنج كەمپ یێن پەنابەرانە و 15 كەمپ ژی یێن ئاوارەیانە. گۆت ژی: «بتنێ ژ خەلكێ شنگالێ، هێشتا 280 هزار كەس ل ناڤ كەمپان و دەرڤەی كەمپان دژین و نەشیاینە ڤەگەرنە سەر مال و حالێن خۆ.»
پیر دەیان تەكەز كر كو خەلكێ شنگالێ هەست ب مەترسیێ دكەن، لەورا نەشێن ڤەگەرن، سەرەرای وێ چەندێ كو بەری نوكە بەرنامەیەك ب هەڤكاری ل دگەل حوكمەتا هەرێمێ و دەزگەهێ خێرخوازیێ بارزانی بۆ ڤەگەراندنا وان هاتبوو دارشتن.
زێدەتر گۆت: «ئەو ئاوارەیێن ڤەگەڕیاینە شنگالێ، هەڤكاری ل گەل هاتبوو كرن، لێ نوكە هەڤكارییا رێكخراوان نەمایە و حوكمەتا ئیراقێ ژی ب بهانەیا نەبوونا پارەیێ بەردەست قەرەبوویا ئاوارەیان ناكەت، ئەڤە ژی ئەگەرێ سەرەكی یێ مانەڤا خەلكی یە د ناڤ كەمپان دا.»
ل دووماهیێ پیر دەیان دیار كر كو ئەڤساڵە بتنێ 79 خێزان ڤەگەڕیاینە شنگال، گرعزێر، دووگری و گوندێ وەردیە. ناڤبری داخواز كر كو پێدڤییە بەغدا هەڤكارییا ئاوارەیان بكەت دا كو بشێن ڤەگەرنە سەر جه و وارێن خۆ و رێگری ل گوهۆڕینا دیمۆگرافی ل شنگالێ بهێتە گرتن.
