بەغدا خالێن گۆمرکی د ناڤبەرا ھەرێمێ و عیراقێ دا دانان
ئه‌ڤرۆ نيوز:
ئەنداما لژنا ئابووری و وەبەرھێنانێ ل جڤاتا نوونەرێن عیراقێ بۆ ئەڤرۆ دیار کر کو حوکمەتا عیراقێ خالێن گۆمرکی د ناڤبەرا ھەرێما کوردستانێ و پارێزگەھێن دی یێن عیراقێ دا دانان و گۆت: “ھەر بازرگانەکێ کەلوپەلان ژ ھەرێمێ بۆ پارێزگەھێن دی یێن عیراقێ ببەت دێ باج ژێ ھێتە وەرگرتن”.
نەجیبا نەجیب، ئەنداما لژنا ئابووری و وەبەرھێنانێ ل جڤاتا نوونەرێن عیراقێ ئاشکرا کر، ب مەرەما ب جھئینانا قانوونا پێناسا گۆمرکی، حوکمەتا عیراقێ دەست ب دانانا خالێن گۆمرکی د ناڤبەرا ھەرێما کوردستانێ و پارێزگەھێن دی یێن عیراقێ دا، ب تایبەتی ژی ل سنوورێ پارێزگەھا کەرکووکی کریە، چونکو نوکە بازرگانێن ھەرێمێ د رێیا کەرکووکێ را کەرەستێن خوارنێ و ڤەخوارنێ و ناڤمالێ و ھەموو پێدڤیێن دی بۆ پارێزگەھێن دی یێن عیراقێ دبەن و گۆت: “حوکمەتا عیراقێ ب رێیا دانانا خالێن گۆمرکی دێ باجێ ژ بازرگانان وەرگریت، دا کو داھاتێ خوە پێ زێدە بکەت”.
خویا ژی کر، ل سەرانسەری عیراقێ 35 خالێن گۆمرکی یێن فەرمی و نەفەرمی ھەنە لێ گەلەک خالین گومرکی ھەتا نوکە حوکمەتا عیراقێ نەشیایە ب دروستاھی بێخیتە د بن کۆنترولا خوە دا و مفای ژێ وەربگریت، نوکە چەند خالێن گۆمرکی کەڤتینە د دەستێن رێکخراوا تیرۆرستیا داعشێ دا و گۆت: “نوکە حوکمەتا عیراقێ ب مەرەما ب جھئینانا قانوونا پیناسا گۆمرکی یا خالێن گۆمرکی د ناڤبەرا ھەرێمێ و پارێزگەھێن دی یێن عیراقی دا ددانیت”.
نەجیبا خانێ گۆتژی: “ئەڤە بخوە ژی دانپێدانە ژ لایێ عیراقی ڤە ب ھەرێما کوردستانێ وەکو وەلات، چونکو خالێن گۆمرکی د ناڤبەرا دەولەتان دا دھێنە دانان، ئەڤە ژی د بەرژوەندیا ھەرێما کوردستانێ دایە، ھەر چەندە دبیت باجەکا زێدەتر بکەڤتە سەر بازرگانیێ”.
