بەغدا دانپێدانێ ب مۆلەتێن ژوورێن بازرگانی یێن کوردستانێ ناکەت
ئەڤرۆ نيوز:
سەرۆکێ ژوورا پیشەسازی و بازرگانی ل پارێزگەھا دھۆکێ راگەھاند کو ھەتا نوکە ژی حۆکمەتا عیراقێ دانپێدانێ ب وان مۆلەتان ناکەت یێن ئەم ددەینە کارگەھان و ژ وان دخوازن ل بەغدا مۆلەتان وەربگرن و ڤێ یەکێ ژی زیانێن مەزن ب کارگەھێن پیشەسازی و ھەموو جۆرێن کارگەھان گەھاندیە.
شێخ ئەیاد حەسەن، سەرۆکێ ژوورا بارزگانی و پیشەسازی ل پارێزگەھا دھۆکێ بۆ ئەڤرۆ دیار کر، حۆکمەتا عیراقێ دانپێدانێ ب وان مۆلەتا ناکەت ئەوێن ژوورێن بازرگانی یێن ھەرێمێ یان ژی رێڤەبەریا گشتیا وەبەرھێنانێ ددەنە کارگەھان و حۆکمەتا عیراقێ دخوازیت کارگەە بچنە بەغدا ڤی جۆرێ مۆلەتێ وەربگرن و چو دانپێدانێ ب یێن ھەرێمێ ناکەت و ئەڤە ژی ئاریشەیەکا مەزنە بۆ خودانێن کارگەھان.
شێخ ئەیاد ئەو یەک ژی دیار کر، نھا ل ناڤ پارێزگەھێن عیراقێ دا گۆمرک ھاتینە دانان و باج دھێتە وەرگرتن و ل گۆرەی یاسایا عیراقی نابیت ئەڤ گۆمرکە دناڤبەرا پارێزگەھا دا ھەبن و باج بھێتە وەرگرتن و مە ژی وەکو ژوورا بازرگانی ب فەرمی داخواز ژ حۆکمەتا ھەرێما کوردستانێ کریە کو ھاریکارا مە بکەن د نەمانا ڤان گۆمرکان دا و ھەروەسا باج زێدەتر بکەڤیتە سەر بەرھەمێ دەرڤە، دا کو بەرھەمێ خۆمالی زێدەتر گەشەیێ بکەت.
