بەغدا دێ نیڤ سولفێ ژ مووچێن فەرمانبەران بۆ ھەرێمێ ھنێریت
ھەولێر، قائید میرۆ:
پەرلەمانتارەکێ کورد ل بەغدا ئیماژە ب ڤێ چەندێ دکەت، کو چو ئومێد نەماینە بەغدا بودجە و مووچێ ھەرێما کوردستانێ فرێ بکەت، بەلێ وەزیرێ دارایی ئەو چەندە بۆ وی پشتڕاست کریە، کو د دەمەکێ ھەری زوو دا دێ نیڤ سولفە ژ بەغدا گەھیتە ھەرێما کوردستانێ.
دکتۆر عەرەفات کەرەم، ئەندامێ پەرلەمانێ عیراقێ بۆ رۆژناما ئەڤرۆ دیار کر، کو پێدڤیە عیراق د دەمەکێ زوو دا بۆدجە و مووچێ ھەرێما کوردستانێ فرێ بکەت و گۆت”بودجێ سالا 2014ێ ژ لایێ نوری مالکی سەرۆک وەزیرێن بەرێ یێ عیراقێ ھاتیە تالانکرن و ب تنێ بۆ میلیشیێن شیعە ئێک ملیار دۆلار ھاتیە مەزاختن، ھەتا کو عەبادی ب خوە ژی ئیماژە ب ڤێ چەندێ کریە”.
ناڤبری خویا ژی کر کو ئەو پارێ ل بەغدا مای بەھرا مووچێ فەرمانبەرێن ھەرێما کوردستانێ ناکەت، بەلێ ژ بلی ڤێ چەندێ وی پێزانین ھەنە کو عیراقێ ٧٧-٨٠ ملیار دینار د خەزینێ دا ھەنە و گۆت “دشێت ئەڤی پارەی بۆ مووچێ فەرمانبەرێن ھەرێما کوردستانێ بمەزێخیت”.
عەرەفاتی گۆت ژی”ھێشتا یا دیار نینە کا دێ بەغدا ب تەئیکیدی مووچێ فەرمانبەران ھنێریت یان ژی نە، راستە زۆرجارا داخویانی ھاتینەدان ل دۆر ھنارتنا مووچێ فەرمانبەران، بەلێ یا باوەریێ نینە، ھەرچەندە ل دۆر ھنارتنا مووچەی ئەز دگەل ھشیار زێباری وەزیرێ دارایێ عیراقێ ئاخفتیمە و گۆتیە، بڕیارە نیڤ سلفەی ژ بەھرا مووچێ فەرمانبەران فرێ بکەت، لێ نزانم دێ تێرا مووچێ چەند ھەیڤان کەت، ژبەرکو ئەڤە بوونە دەە ھەیڤ بەغدا قەردارێ فەرمانبەران، ڤێجا ئەڤی نیڤ سلفێ بەھرا چەند ھەیڤان کر دێ ھێتە بەلاڤکرن”.
پەرلەمانتارەکێ کورد گۆت ژی “مە ئاریشەکا دی ژی ھەیە و ھەر چەندە مە بەحس نەکر دگەل بەغدا، چونکو مووچێ فەرمانبەران زەرورترە، ئەوژی کریا کۆمپانیێن بەرھەمئینانا پترۆلا ھەرێما کوردستانێ نە، ئەم قەردارێ وان ژینە و دڤێت بەغدا کریا وان کۆمپانیا ژی بدەت”.
