بەغدا دێ کەڤیتە د دەستێ داعشێ دا؟
پشتی کوترۆلکرنا پتریا دەڤەرێن پارێزگەھا ئەنبارێ ژلایێ رێکخستیا داعش یا تیرۆرستی ڤە و گەفێن سەرۆکێ وێ رێکخستیا تیرۆرستی بۆ ھەردو باژێرێن بەغدا و کەربەلا، چاڤدێر ژبەر پێگەھێ نوکە یێ داعشێ کو تنێ ٤٠ کیلۆمەتران ژ بەغدا ددوورن، ھوشداریێن مەترسیێ ل سەر بەغدا ددەن و ناڤەندێن حوکمەت و پەرلەمانێ عیراقێ داخوازا ھنارتنا ھزارەھا چەکداران دکەن بۆ ئەنبارێ بۆ رێ گرتن و مژوولکرنا چەکدارێن تیرۆرستێن داعشێ.
ل دووڤ رۆژناما (الغد) یا ئوردنی، ئەو ھوشداریە یا ھەڤدەمە ل گەل دو جار دەرکەفتنا سەرۆکێ رێکخستیا داعش یا تیرۆرستی و گەفێن وی کو دێ شەڕێ وان یێ داھاتی ل بەغدا و کەربەلا بیت.
رووبەرێ پارێزگەھا بەغدا ٤.٥٥٥ کیلومەترێن سێجارکی یە، ئانکو ١.٠٤% ژ رووبەرێ گشتیێ عیراقێ یە، ھژمارا ئاکنجیێن بەغدا ژی د ناڤبەرا شەش ھەتا حەفت ملیۆن کەسانە، ئانکو دوەمین مەزنترین ئاکنجیێن د ناڤ باژێرێن وەلاتێن عەرەبی دایە پشتی قاھیرە پایتەختێ مسرێ، باژێرێن ئەبو غرێب ل رۆژئاڤا و مەحموودیە و یوسفیە ل باشووری و تاجی و تارمییە ل باکووری و حوسێنیە ل رۆژھەلاتێ بەغدا نە و ژ رویێ ئیداری ڤە ب سەر پارێزگەھا بەغدا ڤەنە.
دھێتە زانین دەوروبەرێن بەغدا ھەموو دەڤەرێن چاندنێ نە، سەرەرای ھەبوونا ھندەک کارگەھێن پیشەسازی و پەترۆلی و لەشکری، لێ پتریا وان دەڤەران یێن د دەستێ داعشێ دا کو ژ رویێ ئیداری ڤە یێن خستینە ب سەر (ویلایەتا فەلوجە) ڤە.
دیسا داعشێ شانێن چەکداری یێن ل چەند دەڤەرێن دی یێن نێزیکتر ژ بەغدا یێن ھەین کو دەم بۆ دەمی نەئارامیێ ل دەڤەرێ دروست دکەین و پەقینێن خوەکوژی ئەنجام ددەن کو گەلەک جاران ل وان دەڤەران قەدەغەکرنا ھاتنوچوونێ دھێتە کرن.
گەلەک چاڤدێر بۆ وێ چەندێ دچن کو دبیت داعشێ شیانێن وێ چەندێ نەبن کو زێدەتر بەر ب بەغدا ڤە بچیت، ل گەل وێ چەندێ داعش بزاڤێ دکەت ئەو دەڤەرێن نێزیکی بەغدا کو دبن دەستێ وێ دانە ب پارێزیت کو چەکدارێن داعشێ ل وان دەڤەران نە زێدەترن ژ ھزار چەکداران و ب وێ ھژمارا چەکداران نەشێن کونترۆلا باژێرەکێ وەکو بەغدا بکەن، د بەرامبەر دا حوکمەتا عیراقێ خودانا دو فرقێن لەشکری یە ل بەغدا ل گەل فرقەکا پۆلیسێن فیدرالی و سێ فەوجێن زریپۆش و دو فەوجێن تانک و ھژمارا سەربازێن عیراقێ ل وێرێ دگەھنە ٢٠ ھزار سەربازان، زێدەباری شەش ھزار چەکدارێن حەشد شەعبی، لێ چاڤدێر زێدەکرنا ھێزان ل بەغدا ب پێدڤی دزانن بۆ پاراستنا وی باژێری.
