بەغدا قەرەبوویا زیاندارێن شەڕێ داعشێ ناکەت
ئەڤرۆ نیوز:
رێڤەبەرێ ناحیا زومار راگەھاند، ئەڤە سالەک ب سەر ھێرشا تیرۆرستێن داعشێ بۆ زومار و شنگالێ بۆری، لێ ھێشتا حوکمەتا عیراقی قەرەبوویا زیاندارێن وان ھێرشان نەکریە.
ل ٢ تەباخا ٢٠١٤ ێ، تیرۆرستێن داعشێ ناحیا زومار داگیرکر و ژ ئەگەرێ بەردەوامیا شەڕی کو چار ھەیڤان کێشا، ژبلی زیانێن گیانی و ئاوارەبووونا وەلاتیێن سڤیل، زیانەکا مەزن ژی ب مولک و خانیێن خەلکێ دەڤەرێ کەفتبوو.
موزاحم سەعدوون رێڤەبەرێ ناحیا زومار بۆ مالپەرێ فەرمیێ پارتی گوت” زێدەتر ژ ٤٠٠ خانی ل سنۆرێ ناحیا زومارێ ژ ئەگەرێ مینان زیان یا پێکەفتی و ژ وێ ھژمارێ ژی ٢٥٠ خانی ھاتنە ھەرفاندن، پشتی رزگارکرنا زومارێ ژی ژلایێ ھێزێن پێشمەرگەی ڤە و زڤرینا دام و دەزگەھێن حوکمەتێ، مامەلێن وان ل دادگەھێ یێن تمام بووین و داخوازا قەرەبووکرنێ ژ حوکمەتا عیراقێ یا کری، بەلێ ھەتا نوکە چو بۆ نەھاتیە کرن”.
موزاحمی زێدەتر گوت” وەکو رێڤەبەریا ناحیا زومار، داخوازێ ژ حوکمەتا بەغدایێ دکەین زیاندارێن شەڕێ داعشێ قەرەبوو بکەت و ئەڤە ئەرکێ حوکمەتا ناڤەندی یە و ئەو یا بەرپرسیارە ژ دروستبوونا وێ رەوشێ”.
دھێتە زانین ناحیا زومار ل ٢ تەباخا ٢٠١٤ێ ژلایێ تیرۆرستێن داعشێ ھاتبوو داگیرکرن و ل ٢٥ چریا ئێکێ ٢٠١٤ ێ ژلایێ ھێزێن پێشمەرگەی ڤە ھاتبوو رزگارکرن و پتریا ئاکنجیێن وێ یێن زڤرین سەر مال و مولکێن خوە.
