بەغدا ڕێككەفتن پێشێلكرینە و قانوونا بودجەی بجهنەئینایە
ئەندامەكێ جڤاتا نوونەرێن ئیراقێ دبێژیت: بۆ دابینكرنا شایستەیێن دارایی یێن فەرمانبەران، هەرێما كوردستانێ هەموو پێگیریێن خوە د قانوونا بودجەی دا بجهئیناینە، ئەگەر چ قانوون ب ڕێككەفتن د ناڤبەرا بەغدا و هەولێرێ دا نەهاتیە پەسەندكرن و ل سەر مە هاتیە سەپاندن، بەلێ سەرەرای ڤێ چەندێ ژی، حوكمەتا فیدرالی پێگیری قانوونێ نەبوو و ڕێككەفتن پێشێل كرینە.
سیپان شێروانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان سەبارەت وێ چەندێ هەكە بەغدا بەردەوام بوو ل پێشێلكرنا ڕێككەفتنان و شایستەیێن دارایی یێن هەرێمێ نە هنارتن، حوكمەتا هەرێمێ دشێت چ بكەت؟ گوت» ڕێكێن قانوونی، كارگێری و سیاسی و گەلەك ڕێكێن دی ل بەرمە هەنە بۆ وێ چەندێ دژی حوكمەتا فیدرالی بكاربینین و ب گۆرەی بڕگەیا حەفت ژ مادەیا 13 ژ قانوونا بودجەی، هەكە هەولێر و بەغدا ل دۆر هنارتنا شایستەیێن دارایی یان هەر پرسەكا دی نەگەهشتنە ڕێككەفتنێ، سەرۆك وەزیرێن ئیراقێ د دەمێ 15 ڕۆژان دا دێ بڕیارا پێدڤی ل دۆر بڕیارێ دەت و كێشەیێ ئێكلاكەت».
دیاركر ژی» د وێ باوەریا دامە كو محەمەد شیاع سۆدانی، سەرۆك وەزیرێن ئیراقێ دێ قانوونێ سەروەر كەت و دستووری بجهـ ئینیت و بڕیارا پێدڤی دێ دەركەت».
كارتا قانوونی وەكو سیپان شێروانی باس كری، دوەمین كارتە كو حوكمەتا هەرێما كوردستانێ دشێت دژی بەغدا بكاربینیت و ئاماژە دكەت» سەرەرای وان هەموو تێبینیێن مە ل سەر دادگەها فیدرالی یا ئیراقی هەین، حوكمەتا هەرێما كوردستانێ دشێت كارتا قانوونی بكاربینیت و ل دادگەها فیدرالی سكالایێ تۆمار بكەت بۆ وێ چەندێ كێشە بهێتە ئێكلاكرن، هەرچەندە مە گەلەك گۆمان ل سەر بڕیارێن وێ دادكەهێ یێن هەین».
وی پەرلەمانتارێ فراكسیۆنا پارتی خویاكر ژی» كارتا سیێ د دەستێ حوكمەتا هەرێما كوردستانێ دا، كارتا سیاسی یە و بڕیارا سیاسی ژ ئالیێ سەركردایەتیا كوردی و سەرۆك مەسعود بارزانی دهێتە دان، كارتەكا گەلەك ب هێزە و دێ كاریگەریەكا مەزن هەبیت».
سیپان شێروانی د پشكەكا دی یا ئاخڤتنێن خوە دا گوت ژی» گەلەك جاران دهێتە گوتن، ئایا هەولێر و بەغدا ڕێككەفتینە یان نە؟ بەلێ ڕێككەفتن ژمێژە هاتیە كرن. ل دۆر پرسا پەترۆلێ، ڕۆژا 4/4/2023 هەردو سەرۆك وەزیرێن ئیراقێ و هەرێما كوردستانێ ڕێككەفتن ئیمزاكریە و سەبارەت هووردەكاریێن هنارتنا شایستەیێن دارایی ژی، ڕۆژا 27/7/2023، هەردو شاندێن بەغدا و هەولێرێ ڕێككەفتن، بەلێ ژ ئەگەرێ وێ چەندێ ئیراق وەلاتەكێ دەزگەهی، قانوونی و دستووری نینە ڕێككەفتن ناهێنە بجهئینان».
پتر ڕۆهنكر ژی» ئەو حزب و ئالیێن سیاسی یێن نوكە یێن ئیراقی كو نیاز هەیە یان خەونێ ب وێ چەندێ ڤە دبینن كو قەوارەیێ هەرێما كوردستانێ ژ ناڤ ببەن، گەلەك ژ ڕژێما پێشتر یا ئیراقێ لاوازترن كو ل سالێن نۆتان دا كار بۆ ژناڤبرنا كوردان دكر و پاشی نەچاربوو دەست ب دانوستاندنان ل گەل كوردان بكەت».
هەروەسا دیاركر» ب درێژیا 100 سالێن بۆری، هەر دەمێ ئیراق بێ هێز بووی، داخوازا هاریكاریێ ژ كوردان كریە و گوتیێ دێ مافێن هەوە یێن دستووری دەین و هەر چ تشتێ هەوە بڤێت دێ بۆ هەوە ئەنجام دەین، بەلێ دەمێ ب هێز دبیت، شەڕێ كوردان دكەت و كار بۆ ژناڤبرنا كوردان كریە، ئەڤ ئەقلیەتە هەتا نوكە ژی یا مای».
