بەنداڤا ئەلیسۆ دێ زیانێ گەهینیتە کەرتێ چاندنێ ل عیراقێ
ئەڤرۆ نیوز:
لژنا چاندنێ ل پەرلەمانێ عیراقێ هۆشداری دا ژ كارتێكرنا بەنداڤا ئەلیسۆ یا تورکی ل سەر پلان و پرۆژێن چاندنێ ل عیراقێ.
سەلام شەمەری سەرۆكێ لژنا چاندنێ ل پەرلەمانێ عیراقێ دیار کریە: کو هەموو پلان و پرۆژێن ستراتیژی یێن حوکمەتا عیراقێ و وەزارەتێن پەیوەندیدار د وارێ چاندن و ئاڤدانێ دا، پشت گرێدانێ ب ئاڤا هەردو رووبارێن دیجلە و فوراتی دكەن.
ناڤهاتی ئاشکرا کر ژی: نەبوونا رێككەفتنەكێ دناڤبەرا بەغدا و ئەنقەرە دا ل سەر بەهرا عیراقێ ژ ئاڤا رووبارێ دیجلەی، دێ كارتێكرنەكا خراب كەتە سەر سێكتەرێ چاندنێ و پلانێن گەشەپێدانا وی كەرتی ل عیراقێ، لەوما وی داخواز ژ حوکمەتا عیراقێ كریە، کو بزووترین دەم ل گەل توركیا بگەهیتە رێككەفتنەكێ بۆ مسوگەركرنا بەهرا عیراقێ ژ ئاڤا هەردو رووباران، دیسان رێک نەهێتەدان، کو تورکیا ئاڤێ وەكو كارتەكا فشارێ بۆ هندەك مەرەمێن سیاسی ل دژی عیراقێ بكار بینیت.
