بەنداڤا گوندێ كوانێ دێ هێتە نووژەنكرن
ئامێدیێ، مەحمود نهێلی:
ژ ئەگەرێ بارینا بارانێن زۆر و دروستبوونا لەهیان و هڕیانا ئاخێ بۆ ناڤا بەنداڤێ، بەنداڤا گوندێ كوانێ تێكچوبوو، د شیان دا نەبوو مفا ژێ بهێتە وەگرتن، نوكە ژ لایێ هۆبا ئاڤدێریا ئامێدیێ ڤە دەست ب نووژەنكرنا وێ هاتیە كرن.
ئەندازییار بۆتان ئامێدی، بەرپرسێ هۆبا ئاڤدێرییا ئامێدیێ بۆ رۆژناما ئەڤرۆ دیار كر، سالا بۆری گەلەك باران ل دەڤەرێ باری و مفایەكێ باش ژێ هاتیە وەرگرتن، لێ زیانێن زۆر گەهاندینە هندەك كەرتان، ژ وان ژی: پۆند و سكرێن ئاڤێ، ژ وان بەنداڤان ژی، بەنداڤا گوندێ كوانێ یە.
ناڤهاتی ئاشكرا ژی كر، نوكە هۆبا وان ب هەڤكاری ل گەل رێكخراوا كۆپنی، كو رێكخرەوەكا گرێداییە ب كاروبارێن مەسیحیان ڤە، دەست ب نووژەنكرنا وێ كریە و ئەو ئاخ و تشتێن كەفتینە د ناڤ بەنداڤێ دا دێ هێنە راكرن و دێ جارەكا دی ئاڤ لێ كۆم ڤەبیتە ڤە و دێ مفا ژێ هێتە وەرگرتن و كەڤیتە د خزمەتا جۆتیارێن دەڤەرێ دا.
