ئەڤرۆ مەزنترین پێشانگەها نێڤدەولەتی یا خانووبەران ل هەولێرێ دێ هێتە ڤەكرن
زنار تۆڤی:
مەزنترین پێشانگەها نێڤدەولەتی یا خانووبەران، ئەڤرۆ 8/9/2026 ب پشكداریا سەدان كۆمپانیێن خۆمالی و بیانی ل باژێڕێ هەولێرێ دێ هێتە ڤەكرن.
د. محەمەد شوكری، سەرۆكێ دەستەیا وەبەرهێنانێ ل كوردستانێ دیار كر، پتر ژ 250 كۆمپانیان ژ 16 وەلاتێن جیهانی دێ پشكداریێ د پێشانگەهێ دا كەن؛ د ناڤ دا كۆمپانیێن توركی، ئیرانی، ئیماراتی، سعوودی، ئەلمانی، چینی، ئیتالی، یۆنانی، ئیسپانی و چەندین وەلاتێن دی هەنە، پێشانگەه بۆ دەمێ سێ رۆژان دێ یا بەردەوام بیت.
ناڤهاتی گۆت: «ئارمانج ژ ڤەكرنا پێشانگەهێ، نیشادانا پڕۆژەیێن ئاكنجیبوونێ نە و وەلاتی دشێن ڕاستەوخۆ ل گەل كۆمپانیان كۆم ببن و یەكەیێن ئاكنجیبوونێ ب شێوازێ قووناغان یان ب پارەیێ كاش هەلبژێرن، هەروەسا ئەڤ پێشانگەهە ژینگەهەكێ بۆ بازرگان و وەبەرهێنەران پەیدا دكەت، داكو گرێبەستێن هەڤپشك گرێ بدەن و سەرمایێ بیانی ڕابكێشنە كوردستانێ».
سەرۆكێ دەستەیا وەبەرهێنانێ ئاشكرا ژی كر، د سالێن بۆری دا پترین دەرفەتێن كاری بۆ گەنج و شارەزایان د پێشانگەهێ دا هاتینە ڕاگەهاندن، وەلاتی دشێن د دەمێ سەرەدانێ دا بۆ پێشانگەهێ، كورتیا ژیانناما خۆ پێشكێشی كۆمپانیان بكەن ژ بۆ بدەستڤەئینانا دەرفەتێن كاری.
پێشانگەها نێڤدەولەتییا خانووبەران ل هەولێرێ ئێكە ژ روودانێن ئابووری یێن گرنگ ل هەرێما كوردستانێ و سالانە ل پێشانگەها نێڤدەولەتییا هەولێرێ بڕێڤە دچیت.
