بەڕەڤانیێ ژ مافێ خەلكی ب گشتی و ئافرەتێ ب تایبەتی كەم
ئەڤرۆ، دلڤین رەشید:
مافپەروەر فاتما ئەحمەد سلێڤانەی، بەربژارا لیستا 190 یا پارتی دیموكراتی كوردستان هەژمارا وێ 35 ل بازنەیێ دهۆك بۆ رۆژناما ئەڤرۆ دیار كر، دێ كار ل سەر وان پرۆژە یاسایان ئەوێن خزمەتا گشتی دكەن كەت، ب تایبەت ژی یێن گرێدایی ژیارا خەلكی و خێزانان، هەروەسا وان روتینێن گریدایی كارێ دادگەهێ ڤە كو ئاستەنگان بۆ وەلاتیان پەیدا دكەن، ئەو ژی دێ ل سەر یاسایا دادگەهێ و راستڤەكرنا وێ كار كەم، ژبۆ هندێ خەلكێ مە بشێوەیەكێ ئاسانتر بشێن بەڕەڤانیێ ژ مافێن خۆ بەرامبەری دادگەهێ بكەت و گۆت:( ل سەر پرۆژە یاسایا كاری ژی دێ كاركەین ژ بۆ دەستەبەركرنا مافێن كرێكاران و جڤاكی).
بەربژار فاتما ئەحمەد سلێڤانەی ئەو چەندە ژی دیار كر، یا گرنگە دقوناغا ئەڤرۆ دا ئافرەتا كورد ژی د پرۆسەیا هەلبژارتنان دا پشكدار ببیت و ببیتە نوونەر د پەرلەمانێ هەرێما كوردستانێ دا، چونكو ئافرەت دشێت رۆلەكێ باش د ڤێ پرۆسەیێ دا بگێڕیت و بەڕەڤانی ژمافێ مللەتێ كورد ب گشتی و ئافرەتێ ب تایبەتی بكەت، داكو بشێن خێزانا كوردی بپارێزن و ببینە پرەك بۆ چارەسەركرنا ئاریشەیێن وان ب رێكا دانا یاسایێن تایبەت .
ناڤبریێ ل دووماهی گۆت: هەكە بوومە جهێ باوەریا خەلكێ خۆ دێ ب مە فاكتەرەكا كارا بۆ پشتەڤانیكرنا وان بەرنامەیێن پارتا مە پارتی دیموكراتی كوردستان داناین كو ژ كومەكا بەرنامەیێن گرنگ پێكدهێن و هەموو د بەرژەوەندیا خەلكێ كوردستانێ دانە، لەورا داخوازێ ژ جەماوەرێ كوردستانێ ب گشتی و یێ پارێزگەها دهۆكێ ب تایبەتی دكەم دەنگێ خۆ بدەنە لیستا 190 یا پارتی دیموكراتی كوردستان داكو هین بشێن باشەرۆژا خۆ مسۆگەر بكەن.
