بەھمەن حسین: وەلاتیێن کوردستانێ ژ ھەلبژارتنان بێ ئومێد بووینە
ئه‌ڤرۆ نيوز:
بەرپرسەکێ حزبا زەحمەتکێشێن کوردستانێ ئاماژە بوێ چەندێ دکەت، نابیت چو لایەنێن سەرکەفتی د ھەلبژارتنێن پەرلەمانێ کوردستانێ بھێنە پشتگوھاڤێتن، ودیار کر، کێمی یا رێژا پشکداریا وەلاتیان د ھەلبژارتنێن 30ی ئیلوونێ بۆ ناکۆکیێن ناڤبەرا لایەنێن سیاسی و بێ ئومێدبوونا وەلاتیان ژ پڕۆسا ھەلبژارتنان ڤەدگەڕیت.
بەھمەن حسین، ئەندامێ دەستەیا سەرۆکایەتیا حزبا زەحمەتکێشێن کوردستانێ بۆ رۆژناما ئەڤرۆ گۆت: ھەر چەندە ھێشتا قەبارێ دروست یێ چو لایەنەکی ناھێتە زانین چەندە ل پەرلەمانێ داھاتیا کوردستانێ، چونکی ئەنجامێن ھەلبژارتنێن 30ی ئیلوونی بتەمامی نەھاتینە ئاشکراکرن، بەلێ گورەی ئەنجامێن ھاتینە دیارکرن، پێدڤیە ل کابینا داھاتیا حوکمەتا ھەرێما کوردستانێ ھەموو لایەنێن سیاسی پشکداربن و نابیت چو لایەنێن سیاسی و پێکھاتە بھێنە پشتگوھاڤێتن، بەلێ ب دیتنامن دبیت ھەر لایەنەک گورەی رێژەیا کۆرسیێن خوە یێن پەرلەمانی پشکداری حوکمەتێ بکەت، نەک ھندەک لایەنە ھەبن کۆرسیێن کێم ببن و پۆستێن زێدەتر ل حوکمەتێ وەربگرن، ھەرچەندە سێ لایەنێن سیاسی ھەتا نوکە ھەلویستێ خوە دیارکریە، کو ب چو شێوەیەکی پشکداری کابینا داھاتیا حوکمەتا ھەرێما کوردستانێ دا ناکەن، ئەڤ بۆچوون ژی راستنینە دەمێ دبێژن حوکمەتا بنکە فراوان یا سەرکەفتی نینە، چونکە ھەکە حوکمەت یا ب ھێزبیت چو پەیوەندی ب ھەبوونا ئۆپۆزسیۆنێ و حوکمەتا بنکە فراوان نینە، ھەرچەندە ئەز بخوە دگەل ڤێ چەندێ مە ھێزێن ئۆپۆزسیۆن ھەبن ل ھەرێما کوردستانێ و چاڤدێریا کارێ حوکمەتا ھەرێما کوردستانێ بکەن و رۆلێ خوە ھەبیت وەک ئۆپۆزسیۆن.
بەھمەن حسین گۆت: مخابن کێمیا رێژەیا پشکداریا وەلاتیان د ھەلبژارتنێن ڤێجارێ یێن پەرلەمانێ کوردستانێ مەترسیدارە بۆ داھاتی و دبیت وەلاتی بھێنە ئاشتکرن، چونکی وەلاتی بێ ئومێد بووینە ل پڕۆسا ھەلبژارتنان، ھەرچەندە کۆرسیێن ھندەک لایەنان زێدەکریە، بەلێ کێمیا رێژەیا پشکداریا دەنگدەران د ھەلبژارتنان نیشانا بێ ئومێدیا وەلاتیانە ل پڕۆسا ھەلبژارتنان، لەوڕاژی یا فەرە لایەنێن سیاسی بەری حوکمەتا نوویا ھەرێما کوردستانێ پێک بینن، ناکۆکیێن ناڤبەرا خوە چارەسەر بکەن و ئاشتیەکا گشتی پەیداببیت ل کوردستانێ، ھەتا ئەڤ رەشبینی و بێ ئومێدیا وەلاتیان ب دووماھی بھێت، بڕیارە دناڤبەرا ھەردو ھەلبژارتنان چوار تەمەنێن دیژی پشکداری ھەلبژارتنان بکەن و رێژەیا پشکداریێ زێدەبن، بەرۆڤاژی ب ئەگەرێ نەبوونا باوەریێ و ناکۆکیێن سیاسی دناڤبەرا لایەنێن ھەرێما کوردستانێ وەلاتیان بایکۆتا ھەلبژارتنان کر، کو بدیتنامن ئەڤە بۆداھاتیا ھەرێما کوردستاینێ یا مەترسیدارە و پێدڤی ب چارەسەرکرنێ ھەیە.
