ب ئەگرێ پەکەکێ 115 گوندێن سیدەکان ئاڤا نەبووینە
ئه‌ڤرۆ نيوز:
رێڤەبەرێ ناحیا سیدەکان یا سەرب پارێزگەھا ھەولێرێ ئاماژە بڤێ چەندێ دکەت، ب ئەگەرێ ھەبوونا بنکە و بارەگایێن پارتا کرێکارێن کوردستانێ پکەکێ پتری نیڤا گوندێن دەڤەرێ ئاڤا نەبووینە و دیارکر، ھەردەمێ پەکەکە خوە ڤەکێشیت ل ناف خاکا ھەرێما کوردستانێ دێ پڕۆسا ئاڤاکرنێ گەھیتە ئەڤان گوندان.
ئیحسان چەلەبی، رێڤەبەرێ ناحیا سیدەکان یا سەر ب پارێزگەھا ھەولێرێ بۆ رۆژناما ئەڤرۆ گۆت” ھەر لسالا 1998ێ وەرە ھەتا نوکە پەکەکێ بنکە و بارەگایێن خوە ل سنورێ ناحیا سیدەکان یا سەرب قەزا سۆرانڤە داناینە و دەست بسەر دەڤەرەکا بەرفرەھا ھەرێما کوردستانێ دا گرتیە، کو ب ئەگەرێ بوونا پەکەکێ ل دەڤەرێ لسەرجەمێ 262 گوندێن گرێدایی ناحیا سیدەکان تنێ 147 گوند ھاتینە ئاڤاکرن و وەلاتی تێدا ئاکنجینە و 115 گوندژی بن کۆنتڕۆلا پارتا کرێکارێن کوردستانێ پەکەکێ دانە، زۆربەیا خەلکێ گوندێن نەھاتینە ئاڤاکرن نوکە د بێکارن و ل دەوروبەرێ باژێڕێ ھەولێرێ ئاکنجینە.
ئیحسان چەلەبی گۆتژی” لرۆژێن بۆری پەکەکێ بنکە و بارەگایێن خوە ل ھژمارەک گوندێن دی یێن دەڤەرێ داناینە و دەڤەرا دەشتە ھێتژی ئێخستیە بن دەستێ خوە، ھەتا خالێن پشکنینێ داناینە و رێکێ نادەن وەلاتی بێی پرسا وان ھاتن وچوونێ بکەن، ئەگەر بھێت و پەکەکە مینا شنگالێ بڕیارا خوە ڤەکێشانێ بدەت ل دەڤەرێن وەکی سیدەکان، گوندی دێ ڤەگەڕن سەر جھێن خوە و حوکمەتا ھەرێما کوردستانێ ژی یا بەرھەڤە پڕۆژێن خزمەتگوزاری بگەھینیت گوندان، چونکە پتریا خەلکێ وان گوندان نوکە د بێکارن و نەچارن ڤەگەڕن سەر گوندێن باب و کالێن خوە، بتایبەتی دەڤەرا مە یا دەولەمەندە ب چاندنێ و جھەکێ گونجایی ھەیە بۆ کارێ ئاژەلداریێ، مخابنی ڤە سالێن بۆری دەڤەرامە ببو مەیدانا شەڕێ تورکیا و پەکەکێ بڤێ ئەگەرێ ژی زیانێن زۆر یێن مادی و گیانی لێ پەیدابوون و زیانێن مەزن گەھاندینە ژێرخانا ئابوریا دەڤەرێ، لڕۆژا 11ی ئادارێ ژی وەلاتێ تورکیا دەست ب ئۆپەڕاسیۆنێ کریە بۆسەر چەکدارێن پەکەکێ و ب درێژاھیا چەندین کیلۆمەترا ھاتیە ناڤا خاکا ھەرێما کوردستانێ، ئەڤێ ئەم زۆر دلگرانین ئەڤە بەردەوام پەکەکە دچیتە سەر سنوری و چالاکیان دژی سوپایێ تورکیا و جەندرمەیان ئەنجامددەت و جاردی ڤەگەڕن ناڤا خاکا ھەرێمێ، لەوڕاژی بەھانە چێدبیت بۆ تورکیا و بەردەوام و دەڤەرێن گرێدایێ ناحیا سیدەکان تێنە بوردۆمانکرن.