ب به‌لگه و ڤيديۆ: ژماره‌كا كادرێن هه‌ڤپه‌يمانيێ دهێنه ناڤ رێزێن پارتى
ئه‌ڤرۆ نيوز، نيوار محه‌مه‌د سه‌ليم:
پشتى به‌لاڤبوونا ده‌نگويێ وێ چه‌ندێ كو ژماره‌كا زۆر يا ئاليگر و پشته‌ڤانێن هه‌ڤپه‌يمانيێ هاتينه ناڤ رێزێن پارتى ديموكراتى كوردستان، به‌رپرسێن هه‌ڤپه‌يمانيێ وه‌سان دانه زانين كو چو كه‌س ژ ناڤ هه‌ڤپه‌يمانيێ نه‌چووينه ناڤ پارتێن ده‌سته‌لاتێ و ب تنێ بانگه‌شا هه‌لبژارتنايه.
وه‌لات عادل، سه‌رۆكێ بازنێ باتيفا و ئه‌ندامێ جڤاتا زاخۆ يێ هه‌ڤپه‌يمانيێ د ديداره‌كێ دا بۆ ئه‌ڤرۆ نيوز ئاشكه‌را كر كو ئه‌و نێزيكى 450 كه‌سان دبن رێزێن هه‌ڤپه‌يمانيێ بجهـ هێلاينه و چووينه ناڤ رێزێن پارتى ديموكراتى كوردستان.
وه‌لات زێده‌تر گۆت: “چو تشتێ دكتور به‌رهه‌م گۆتى وه‌سان ده‌رنه‌كه‌فت و هه‌ر ژ ده‌سپێكێ ئه‌و ئێكه‌تيێن ئيناينه ناڤ هه‌ڤپه‌يمانيێ بۆ مه جهێ گۆمانێ بوون”.
دا زانين ژى كو ئه‌وان گه‌له‌ك جاران هه‌ست ب وێ چه‌ندێ دكر كو د. به‌رهه‌م دێ رێزێن وان بجهـ هێليت و ڤه‌گه‌ريته ناڤ ئێكه‌تيێ و گۆت: “جاره‌كێ من پرسيار ژێ كر كا هه‌كه پۆسته‌كى بده‌نێ ئه‌و دێ ڤه‌گه‌ريته ناڤ ئێكه‌تيێ، گۆتى دێ هنگى ڤه‌گه‌رمه ناڤ ئێكه‌تيێ مام جه‌لال ڤه‌گه‌ريته ژيانێ”.
