ب به‌لگه: گۆڕان هه‌ڤدژى مافێن مرۆڤى زارۆيان دكه‌ته ئه‌ندامێن خوه
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كێ په‌رله‌مانێ كوردستانێ داخواز ژ داواكاريا گشتى دكه‌ت ڤه‌كۆلينێ ل سه‌ر شێوازێ ئه‌ندامه‌تيێ ل ده‌ف گۆڕان بكه‌ت كو زارۆيان ل ده‌ف خوه دكه‌ته ئه‌ندام.
محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا پارتى ديموكراتى كوردستان د داخۆيانيه‌كێ دا بۆ ئه‌ڤرۆ نيوز گۆت: “وه‌كو ئه‌ندام په‌رله‌مانه‌كێ كوردستانێ ب نڤيسارا فه‌رمى من داخواز ژ داواكاريا گشتى كريه كو ڤه‌كۆلينێ د شێوازێ ئه‌ندامه‌تيێ د ناڤ بزاڤا گۆڕان دا بكه‌ت”.
زێده‌تر گۆت: “ئه‌و كه‌سانێن كێمتر ژ 18 ساليێ وه‌كو ئه‌ندامێن حزبا خوه وه‌ردگريت و ئه‌ڤه ژى هه‌ڤدژى مافێ مرۆڤى يه”.
ده‌رباره‌يى مه‌ره‌ما وى ژى ژ ڤێ بزاڤێ گۆت: “يا زانايه كو به‌رى ماوه‌كى ژماره‌كا زارۆيان بۆ مه‌ره‌مێن خوه‌يێن سياسى تێكه‌لى سياسه‌تێ كرن و كارێن تێكدانێ بوو كرن، دخوازين رێگرى ل هه‌مبه‌ر ب ده‌رفه‌ت ديتنا زارۆيان بهێته كرن”.
ئاخفتنكه‌رێ ب ناڤێ فراكسيۆنا پارتى ديموكراتى كوردستان ئاشكه‌را ژى كر كو د ناڤێ هه‌يكه‌لێ وان دا هاتيه “هه‌ر وه‌لاتيه‌كێ كوردستانێ ژيێ وى گه‌هشتبيته 16 سالان، دشێت ببيته ئه‌ندام”، گۆتژى: “ئه‌ڤه دژى قانوونا حزبايه ل هه‌رێما كوردستانێ يا ژماره 17 يا سالا 1993، د مادێ 2 يێ برگا 2 يێ ڤێ قانوونێ دا هاتيه (مه‌رجێ ئه‌ندامه‌تيێ ئه‌وه كو ژيێ 18 ساليێ ته‌مام كربيت”.
محه‌مه‌د عه‌لى ياسين نه‌ڤه‌شارت كو ئه‌ڤ برگه دژى قانوونا “الاحزاب السياسية” مادێ 10ێ بڕگا ئێكێ و گۆت: “ژبلى ڤێ چه‌ندێ ئه‌ڤ بڕگه ل گه‌ل قانوون و رێسايێن جيهانى ژى ناگۆنجيت و پێشێلكرنه‌كا مه‌زن يا مافێن زارۆيان دهێته هژمارتن”.
ده‌قێ داخوازيێ:
بۆ سه‌رۆكایه‌تی داواكاری گشتی هه‌رێمی كوردستان – عێراق
بابه‌ت: داواكاری بۆ لێكۆلینه‌وه له سه‌ر نایاسایی بوونی وه‌رگرتنی كه‌سانی خوار ١٨ سال وه‌كو ئه‌ندامی حیزب
سلاو و رێز
داوا له به‌رێزتان ده‌كه‌م لێكۆڵینه‌وه له سه‌ر به یاسایی بوون یان نه‌بوونی به ئه‌ندام وه‌رگرتنی كه‌سانی خوار ١٨ ساڵ له حیزبی سییاسیدا بكه‌ن. هه‌روه‌ك دیار به پێی په‌یكه‌ری رێكخراوه‌یی بزۆتنه‌وه‌ی گۆڕان كه له مه‌رجه‌كانی ئه‌ندامێتی دا هاتووه ”هه‌ر هاووڵاتیه‌کی کوردستانی ته‌مه‌نی گه‌یشتبێته شانزده ساڵ ئه‌توانێ ببێته ئه‌ندام“. كه ئه‌مه‌یش دژی یاسای ”حیزبه‌كانی هه‌رێمی كوردستان، ژماره ١٧ ، ساڵی ١٩٩٣ “ ه و له مادده‌ی ٢، بڕگه‌ی ٢ ی ئه‌م یاسایه‌دا هاتووه كه مه‌رجی ئه‌ندامێتی ئه‌وه‌یه كه ” ١٨ ساڵی ته‌مه‌نی ته‌واه كردبێ “. هه‌روه‌ها به پێچه‌وانه‌ی ماده‌ی ١٠، برگه‌ی یه‌كه‌می ”قانون الاحزاب السياسية “ عێراقی فیدرال (به‌ڵگه‌كان هاوپێچن).
ئه‌‌مه جگه له‌وه‌ی كه ئه‌م دیارده‌یه له گه‌ل یاسا و رێسا نێوده‌وله‌تییه‌كاندا ناگۆنجێت و به پێشێلكارییه‌كی گه‌وره‌ی مافی منداڵان ده‌زانرێت به‌و پێیه‌ی كه به تێكه‌ڵبوونی منداڵ له گه‌ڵ دونیای سییاسه‌ت دا، ئه‌و منداڵه له مافه‌كانی خۆی بێبه‌ش ده‌كرێت.
هه‌روه‌ك دیار، له ماوه‌ی رابردوودا له هه‌ندێ شار و شارۆچكه‌ی هه‌رێمی كوردستان منداڵ و كه‌سانی خوار ته‌مه‌نی یاسایی بۆ مه‌رامی سیاسی و ئاژاوه‌گێری به‌كار هێنراون، كه ئه‌مه‌یش جێگای سه‌رنجه له كاتێكدا به‌شی هه‌ره‌زۆری ئه‌م منداڵانه ئه‌ندامی بزۆتنه‌وه‌ی گۆڕانن. داواكارم له به‌رێزتان كاری پێویست بۆ به دواداچوونی ئه‌م كه‌یسه بكرێت.
له گه‌ڵ رێزم
محه‌مه‌دعه‌لی یاسین تاها
ئه‌ندامی په‌رله‌مانی كوردستان
٢٠١٥-١١-٠٣
