ب تنێ حزبا دەعوە دشێت کارتێکرنێ ل سەر سلێمانیێ بکەت
ئەڤرۆ نیوز:
سامی ئەترۆشی ئەندامێ بەرێ یێ پەرلەمانێ عێراقێ د دیدارەکێ دا ل دۆر سەرەدانا ھەڤپەیمانیا نیشتیمانیا شیعی بۆ ھەرێما کوردستانێ بۆ رۆژناما ئەڤرۆ دیارکر، خالا سەرەکی یا ھاتنا ھەڤپەیمانیا شیعی بۆ ھەرێما کوردستانێ ئەو بوویە کو جارەکادی ئەو بشێن پەیوەندیێن خوە یێن دو قولی بھێز بێخن ل گەل حوکمەتا ھەرێما کوردستانێ، ھەروەسا لایەنێن سیاسی ژی، دیسا خالەکادی یا گرنگ ھەیە کو عەمار حەکیم ب خوە خۆدانێ وی پرۆژەیە ئەو ژی پرۆژێ ئاشتیا نشتیمانیە و ھەر چەندە ئەڤ پرۆژە تایبەتە ب لایەنێن سوننی ڤە، بەلێ ب گشتی یا گرێدایە ب ھەموو عێراقێ ڤە.
ئەترووشی ھەروەسا گۆت: شیعا پێدڤیا ب کوردان ھەی و بتایبەتی د ڤی پرۆژێ ئاشتیا نیشتیمانی دا، زێدەباری کارتێکرنا سەرۆکێ ھەرێما کوردستانێ ل سەر لایەنێن سوننی و ئەو خزمەتکاری و ھاریکاریێن کوردستانێ بۆ لایەنێن سوننی ئەنجامداین، ئەڤە وە دکەت کو ئەڤ چەندە ببنە پالدەرەک و ھەروەسا لایەنێن سوننی ژی ب گەرمی بھێنە دناڤا ئەڤی پرۆژێ ئاشتیا نیشتیمانی دا، ھەروەسا نوکە دەستھەلاتا عێراقێ یا ددەستێ ھەڤپەیمانیا نیشتیمانی دا کو حزبا دەعوە سەرۆکاتیا حوکمەتا عێراقێ وەرگرتیە، لەورا ھەڤپەیمانیا نیشتیمانی دشێت کارتێکرنێ ل سەر حوکمەتا عێراقێ دروست بکەت و و دشێت وان کێشێن ناڤبەرا بەغدا و ھەرێمێ دا ھەین تا رادەیەکی چارەسەر بکەت.
ئەندامێ پەرلەمانێ بەرێ یێ عیراقێ گۆت: دبیت ئەڤ شاندە بزاڤان بکەت کو لایەنێن سیاسی یێن کوردستانی نێزیکی ئێک بکەت، لێ وان ئەڤ چەندە پێچێنابیت، چونکی کێشێن مە یێن نافخۆیی یێن کوردستانی گرێداینە ب نافخۆیا کوردستانێ ب خوەڤە و چونکی بتنێ حزبا دەعوە دشێت کارتێکرنێ ل لایەنێن سلێمانیێ بکەت، لەورا عەمار حەکیمی ئەو شیانە نینن و نەشێت وێ کارتێکرنێ بکەت، ھەر چەندە حەز دکەت لێک نێزیکیەکێ دروست بکەت، چونکی ھەر ژ دەمێ نەمانا دەستھەلاتا سەدامی و ھەتا نوکە ژی جڤاتا بلندا کو عەمار حەکیم نۆنەراتیا وان دکەت، ئەڤ لایەنە گەلەک نێزیکی کوردانە و حەز دکەن کورد نێزیکی ئێک ببن و چو کێشە ژی وان نەبن، لێ وان ئەو ھێزە نینە کو بشێن لایەنێن کوردی نێزیکی ئێک بکەن.
سامی ئەترووشی خوەیاکر، ھەموو دەما شیعان پێدڤی ب کوردان ھەیە، بۆ پشتگیریا وان د پێکئینانا حوکمەتێ دا،لەورا ھەر حوکمەتەکا دھێتە پێکئینان لایەنێ زۆری د عێراقێ دا دبیتە لایەنێ شیعی، ھەروەسا ھەموو لایەنێن بھێز یێن شیعی ژی خوە داینە ئێک و ل دەمێ ھەلبژارتنا ژی ئەو لایەن تێکناچن، لێ دێ پێدڤی ب کوردان بن بۆ پێکئینانا حوکمەتێ، ھەر چەندە چو جاران عەمار حەکیمی کێشە ل گەل کوردان نە بووینە، لێ کوردان کێشە ل گەل مالکی و حزبا دەعوە ھەبووینە.
زێدەتر دبێژیت:پێدڤیە ھندەک بادەک بھێنە ژێک جۆداکرن، چونکی حەشدا شەعبی نوونەراتیا ھەڤپەیمانیا نیشتیمانی ب گشتی ناکەت، ھەر چەندە نوکە وەکو ھێزەکا ئەمنی یا فەرمی ل عێراقێ ھاتیە نیاسین، لێ ئەڤ حەشدا شەعبی یا ب سەر ھندەک لایەنێن سیاسی یێن شیعان ڤە، ھەروەسا ھندەک لایەنێن شیعی ژی ل دژی سەربخۆەیا کوردستانێ نە، ئەڤە ژلایەکێ ڤە و ژلایەکێ دیڤە، ئەم ژبیر نەکەین کو حزبێن شیعی جەماوەرەکێ زۆر ھەیە، ھەروەسا بۆ رازیکرنا خەلکێ خوە یێ شیعە ھەموو جارا ل گەل مە ناھێن و ھەروەسا نەشێن خەلکێ خوە ل خوە بکەنە دوژمن و نەشێن وێ کێشێ ژی بۆ خوە دروست بکەن. بتایبەتی کو نوکە ھەلبژارتن ژی یێن نێزیک بووین و ئەو بڤی رەنگی جەماوەرێ خوە ژ خوە رازی دکەن. دیسا عەمار حەکیم و ئەو لایەنێن شیعی یێن ل گەل وی باشتر ل دۆزا کوردی دگەھن و ل گەل مە گەلەک د ھەڤکارن، ھەر چەندە سەرۆکێ ھەرێما کوردستانێ مەسعود بارزانی ژی ئاماژە ب ھندێ دایە کو بۆ سەربخوەیا ھەرێما کوردستانێ مە پێدڤی ب بەغدا ھەیە، ھەتاکو ب شێین دەولەتا کوردی رابگەھینین، لێ چو جاران حەشدا شەعبی نابیتە پالپشت و ھاریکار بۆ سەربخوەیا کوردستانێ، لەورا وان گۆتیە ھێشتا زوویە بۆ سەربخوەیا کوردستانێ.
سامی ئەترۆشی زێدەتر دیارکر، نوکە نافمالیا کوردی ل بەغدا یا سست و لاواز بووی، کورد نوکە پێدڤی ب ئێکرێزیێ نە ل بەغدا، داکو بشێن بھێز باخڤن لەورا ھەردەمێ نافمالیا کوردان یا ب ھێز و ئێکگرتی بیت یێن شیاین مافێ خوە ژی ب دەستڤە بینن، ھەروەسا نوکە بەرژەوەندیێن کوردا ل گەل حزب و لایەنێن سوننی دخوازیتە ھندێ کو پێکڤە بن، داکو بشێن داخوازا مافێن خوە ژ حوکمەتا عێراقێ بکەن، ھەر چەندە گەلەک جاران لایەنێن سووننی دژایەتیا کوردان کریە ل سەر چەندین پرۆژێن کوردان، لێ نوکە سوونە گەلەک د لاوازن و وان پێدڤی ب ھاریکاریێ ھەیە، لەورا ھەکە کورد خوە بدەنە ل گەل بۆ داخوازکرنا مافێن گشتی،چو بۆ کوردستانێ بیت یان ژی بۆ ھەر وەلاتیەکێ ل ناڤ عێراقێ دابیت، ئەڤەژی دێ بیتە ھێزەک بۆ کوردا، ھەروەسا ئەو ژی گۆت:پشتی ھەلبژارتنا دێ شیعە یان پێدڤی ب کوردا ھەبیت،ژ پێخەمەت پێکئینانا حوکمەتەکا نیشتیمانی،ھەروەسا بەراھیا ھەموو کەسان شیعە دھێن دەرگەھێ مالا کوردان دقوتن،ژبۆ پێکئینانا حوکمەتێ، لێ دڤێت کورد ب ئێک پاکێج و ب ئێک دەنگ ب چنە بەغدا.
