ب تەكنەلۆژیا پێشكەفتی دێ چاڤدێریا سنۆران هێتەكرن
هەولێر، قائید میرۆ
نوونەرێ وەزارەتا پێشمەرگە ل ژۆرا ئۆپەراسیۆنێن هەڤپشك ل ئیراقێ ئاشكراكر، هەماهەنگی بۆ كۆنتڕۆلكرنا سنورێن هەرێما كوردستانێ دگەل وەلاتێن جیران هاتیەكرن و بڕیارە ب تەكنەلۆژیا پێشكەفتی چاڤدێریا سنوران بهێتەكرن هەروەسا گۆت، پشتی پەسەندكرنا پڕۆژەیێ قانوونا بودجەی سێ هزار زێرەڤان بۆ سنورێن هەرێما كوردستانێ دێ هێنە دامەزراندن و ئالۆزیێن سنوری دێ هێنە چارەسەركرن.
عەمید رۆكن (عادل جەباری)، نوونەرێ وەزارەتا پێشمەرگە ل ژۆرا ئۆپەراسیۆنێن هەڤپشك بۆ ڕۆژنامەیا (ئەڤرۆ) گوت « هەماهەنگیێن باش د ناڤبەرا هەرێما كوردستانێ و حوكمەتا فیدڕال هەنە بۆ كۆنتڕۆلكرنا سنورێن هەرێما كوردستانێ دگەل وەلاتێن جیران و بۆ ڤێ مەرەمێ چەندین كۆمبوون ل سەر ئاستێن بلند د ناڤبەرا هەردو ئالیان دا هاتینە ئەنجامدان، چەندین رێكار هەنە دهێنە بجهئینان بۆ كۆنتڕۆلكرنا سنورێن هەرێما كوردستانێ دگەل هەردو وەلاتێن ئیران و توركیا، چونكە ئەم دزانین سالانە چەندین ئاریشە ل سەر سنوری پەیدا دبن و ئالۆزیێن سنوری بووینە ئەگەر وەلاتیێن هەرێما كوردستانێ ببنە قوربانی، هەروەكی ل چەندین بوردۆمانان وەلاتی شەهید و بریندار بووینە».
زێدەتر گوت» پلان ئەوە بنگەهێن سنوری بهێنە زێدەكرن و ب ڕێكا وان بنگەهان چاڤدێریا هوور ل سەر سنوری هەبیت، هەتا چو لڤینێن نە ئاسایی پەیدا نەبن، حوكمەتا ئیراقێ ژی سۆزدایە هەرێما كوردستانێ دێ هەموو پێدڤی بۆ هێزێن زێرەڤانێن سنوری هێنە دابین كرن، ب تەكنەلۆژیا پێشكەفتی دێ چاڤدێریا سنوری هێتەكرن مینا دانانا كامیرەیێن حەراری و دانانا سیمەكی بۆ دیاركرنا سنوری، هەروەسا پێدڤیێن ڕۆژانە یێن وان هێزێن زێرەڤان دێ هێنە دابینكرن، ڤێ چەندێ ژی دێ كاریگەری هەبیت هەتا ڕادەیەكێ باش سنور بهێتە كۆنتڕۆلكرن و ئەو ئاریشەیێن بەری نوكە هەین نەمینن یان ژی كێمتر ببن».
عەمید رۆكن عادل جەباری ئاماژەكر» سێ هزار كەس ل هەرێما كوردستانێ وەكو زێرەڤانێن سنوری دێ هێنە دامەزراندن و بەری نوكە فۆڕم پێشكەشی وەزارەتا ناڤخوەیا ئیراقێ كرینە، وەزارەتا ناڤخوە ژی چاڤەڕێی پەسەندكرنا پڕۆژەیێ قانوونا بودجێ گشتیێ ئیراقێ دكەت بۆ دەست بكاربوونا وان سێ هزار زێرەڤانێن سنوری، هەردەمێ بودجە هاتە پەسەندكرن دێ ڕێكارێن دامەزراندنا وان هێنە دەستپێكرن، چونكە هژمارەكا زۆر زێدەتر ناڤێن خوە تۆماركرینە و پێدڤی ب چاكسازیێ هەیە د ناڤا ئەڤێ لیستێ دا، ژ بەر كو ب ڕێكا ئونلاین فۆرم هاتینە داگرتن و پشتی بڕیارا دامەزراندنا وان دەربچیت دێ ژئالیێ لژنەیەكا تایبەتمەندڤە پشكنین بۆ هێتەكرن و ددووڤدا دێ مەشق و ڕاهێنان ب زێرەڤانێن سنوری یێن نوو هێتەكرن».
