ب دەھان پارچێن ئەردی ب ناڤێ کەسوکارێن شەھیدان ل دھۆکێ ھاتینە وەرگرتن
ئەڤرۆ نیوز:
چەند کارمەندێن رێڤەبەریا گشتی یا شەھید و ئەنفالکریان ل دھۆکێ ب تۆمەتا وەرگرتنا پارچێن ئەردی ب ناڤێ کەسوکارێن شەھیدان دھێنە تۆمەتبارکرن و ژ بەر ڤێ چەندێ کارمەندەکێ رێڤەبەریا ناڤبری دھێتە دەستەسەرکرن.
نسرەت بادی، رێڤەبەرێ گشتی یێ شەھید و ئەنفالکریان ل پارێزگەھا دھۆکێ ئاشکرا کر کو ئەو ئاگەھداری چو تشتان نینن و دڤێت ئەو ب فەرمی بھێنە ئاگەھدارکرن کا ئەو کارمەندێ وان ژ لایێ کیژ دەزگەھێ ئێمناھیێ ڤە ھاتیە دەستەسەرکرن و ژ بەر چو ئەگەر ھاتیە دەستسەرکرن و چو ل سەر وان پێدڤیە ئەو بکەن و بۆ رووداو گۆت: “من ژی یا ژ خەلکی گوە لێبووی و ئەز نوزانم ئەو کارمەندێ مە ل کیڤەیە و بۆ ڤێ مەرەمێ من نڤیسارەک بۆ پارێزگەرێ دھۆکێ و وەزارەتا کاروبارێن شەھید و ئەنفالکریان ھنارتیە کو بۆ دەمێ 10 رۆژانە کارمەندەکێ مە یێ دیار نینە و ئەم ژی نوزانین ل کیڤە یە”.
ژێدەرەکی نەڤیا ناڤێ خوە دیار بکەت بۆ رووداو دیار کر کو نێزیکی 20 پارچێن ئەردی ب گەندەلی ب ناڤێ کەسوکارێن شەھید و ئەنفالکریان ھاتینە وەرگرتن
ھەمان ژێدەری رەدکر کو ئەو کەسێ گرتی بتنێ بۆ ڤێ پرسێ یێ تۆمەتبار بیت و گۆت: “ئەڤ کارە بێ ھاریکاریا کارمەندێن باژێرڤانی و تاپۆیێ نەھاتیەکرن و نوکە ئەڤ پرسە ل دەستپێکا لێکۆلینێ دایە”.
