ب رێیا ئه‌نجومه‌نێ پارێزگه‌هێ رازیبوونا چێكرنا رێكێن به‌رده‌ره‌ش هاته وه‌رگرتن
ئه‌ڤرۆ نيوز:
پشتی سەروک ئه‌نجومه‌نێ پارێزگه‌ها دهۆكێ دووڤچوونا رێك و روودانێن ل سنوورێ قه‌زا به‌رده‌ره‌ش كری و دگه‌ل ئالیێن په‌یوه‌ندیدار روونشتی و سه‌ره‌دانێن مه‌یدانی بۆ وێ رێكێ هاتینه كرن، سه‌رۆكێ دیوانا ئه‌نجومه‌نێ وه‌زیران رازیبوون بۆ تمامكرنا رێكا چه‌مه ئینایه و كۆژمه‌كێ پاره‌ی بۆ بده‌ست خستیه و ڤان نێزیكان دێ كار ل سه‌ر هێته‌كرن.
جه‌میله محه‌مه‌د ئه‌نداما ئه‌نجومه‌نێ پارێزگه‌ها دهۆكێ دیار كر كو ل دۆر خرابیا رێكێن به‌رده‌ره‌ش كو رۆژانه روودانێن هاتنوچوونێ ل وێده‌رێ روو دده‌ن و خه‌لكه‌ك دبیته قوربانی، خه‌لكی گازندێن خوه گه‌هاندینه ئه‌نجومه‌نێ پارێزگه‌ها دهۆكێ وان دووڤچوونا ڤێ پرسێ كر و گۆت “ب سوپاسی ڤه نێچیرڤان ئه‌حمه‌د سه‌رۆكێ دیوانا ئه‌نجومه‌نێ وه‌زیران رازیبوونا حكوومه‌تێ ئینا و كۆژمه‌كێ پاره‌ی بۆ چێكرنا رێكا (چه‌مه) هاتیه ته‌رخانكرن و ئه‌و كۆمپانیا وێ رێكێ چێ دكه‌ت هاتیه هایداركرن كو ب زووترین ده‌م تمام بكه‌ت و ده‌مێ خلاس دبیت دێ 40 ده‌قیقه ژ دهۆكێ بۆ هه‌ولێرێ كیم بن، چونكی ناچیته به‌رده‌ره‌ش و كه‌له‌كێ، به‌لكو ئێكسه‌ر ژ چه‌مه‌ی (ناڤه‌ندا رۆڤیا) دێ چیته باژێركێ عه‌نكاوه”.
جه‌میلا خانێ ئاشكرا ژی كر كو پشتی دووڤچوونا وان كری، رێكا داره‌توویێ ژی ژ ئالیێ رێك و پرا یا قه‌زا ئاكرێ هاتیه سه‌خبێركرن و نوكه كارێ ل سه‌ر رێكا حسێنی -به‌رده‌ره‌ش دهێته‌كرن و گۆت “سوپاسیا سه‌رۆكێ ئه‌نجومه‌نێ دهۆكێ و ئه‌ندامێن ئه‌نجومه‌نی دكه‌م كو هاریكار بوون ل گه‌ل مه كو بشێین گازنده و داخوازیێن خه‌لكێ خوه بگه‌هینینه ئه‌نجومه‌نێ وه‌زیران و ته‌ڤایا ئالیێن په‌یوه‌ندیدار دا كو ئه‌و رێك بهێنه چاره‌سه‌ركرن، ئه‌ڤجا بلا خه‌لكێ مه بزانیت ئه‌م وه‌كو ئه‌نجومه‌ن پره‌كین د ناڤبه‌را خه‌لكی و حكوومه‌تێ دا ژ بۆ گه‌هاندنا دووڤچوون و گازندێن وان”.
هه‌ژی گۆتنێ یه رێكا به‌رده‌ره‌ش رێیه‌كا ستراتیژیه، چونكی هاتنوچوونا هه‌ولێرێ و دهۆكێ ل سه‌ر ڤێ رێكێ یه، هه‌روه‌سا چه‌ندین رێكێن دی ژی د ناڤ سه‌نته‌رێ قه‌زا به‌رده‌ره‌ش ده‌رباز دبن و پرانیا ڤان رێكا دخرابن و ئێك سایدن و رۆژانه روودانێن هاتنوچوونێ روو دده‌ن، بۆ نموونه رێكا (حسێنیێ – به‌رده‌ره‌ش) ئه‌ڤه ماوێ (8) هه‌یڤانه هاتیه ڤه‌كرن تا نها كه‌تف و هێمایێن هاتنوچوونێ نه‌هاتبوونه دروستكرن، لێ نوكه كار ل سه‌ر دهێته‌كرن، هه‌روه‌سا رێكا (چه‌مه) چه‌ند ساله كار ل سه‌ر دهێته‌كرن و هه‌تا نها تمام نه‌بوویه.
