ب سەدەما باوەرنامێن سەختە 123 قوتابی ژ زانکۆیان ھاتینە دوورخستن
ئەڤرۆ نیوز:
بەرپرسەکێ وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ ئاشکرا کر کو ژ ئەگەرێ باوەرنامێن سەختە 123 قوتابی ژ زانکۆیان ھاتینە دوورخستن.
جەمال کەمال، رێڤەبەرێ خواندنا تایبەت ل وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ دیار کر کو د دەمێ چەند سالێن بۆری دا ھەتا نوکە وەزارەتا خواندنا بلند ل ھەرێمێ 123 قوتابی ل زانکۆیێن تایبەت دوورخستینە ژ ئەگەرێ باوەرنامێن سەختە یێن شەشێ ئامادەیی و بۆ دوارۆژ گۆت: “بەھرا پتریا وان قوتابیان خەلکێ ھەرێما کوردستانێ بوون و بۆ دەمەکی ل زانکۆیێن تایبەت دخواند، بەلێ پشتی ب ھووری ڤەکۆلین ھاتیە کرن دیاربوو کو باوارنامێن وان یێن قووناغا ئامادەیی د سەختەبوون”.
ناڤھاتی ئاماژە دا وێ چەندێ کو ئەو رێ نادەنە قوتابیێن کورد ب وان باوەرنامێن ژ قوتابخانێن ناڤەراست و باشوورێ عیراقێ وەردگرن ل زانکۆیێن تایبەتێن ھەرێمێ بخوینن و گۆت: “ھەر قوتابیەکێ کورد باوەرنامێ ژ قوتابخانێن ناڤەراست و باشوورێ عیراقێ وەرگریت چو مفایی ژێ نابینیت، چونکی ل زانکۆیێن ھەرێمێ ناھێتە وەرگرتن”.
