ب فشارێن ئەمریكا پێشمەرگە دێ ڤەگەریتە ڤە دەڤەرێن كوردستانی
ئەڤرۆ نیوز ، زنار تۆڤی :
پەرلەمانتارەکێ عێراقی ئاشكرا كریە،کو ئەمریكا فشارەکا زۆر ل سەر عەبادی دروست كریە و یا رژدە ل سەر ڤەگەریانا پێشمەرگەی بۆ دەڤەرێن كێشە ل سەر، ئەڤە ژی د دەمەکێ دایە کو بەرپرسێن وەزارەتا پێشمەرگەی ئاماژێ ب هندێ دكەن،کو د هەماهەنگیێ و گوتۆبێژێ دانه بۆ هندێ کو پێشمەرگە بۆ دەڤەرێن مادێ 140 ڤەگەریت.
فردەوس عەوادی پەرلەمانتارێ هەڤەیمانیا دەولەتا قانوونێ د راگەهاندنەکێ دا ئاشكرا كریە،کو ئەمریكا فشارەکا زۆر ئێخستیە سەر حەیدەر عەبادی سەرۆك وەزیرێن عێراقێ، بۆ هندێ کو دوبارە پێشمەرگە ڤەگەریتە وان دەڤەرێن كێشە ل سەر، ئەڤه ژی ژ لایێ مە ڤە دهێته رەتکرن و نابیت حوکمەت ژی بچیتە ژێر فشارێن ئەمریكا، چونكی ئەڤە دێ بیتە ئەگەرێ تەنگژەیێن بەردەوام و دروستبوونا شەری د داهاتیدا.
پێشمەرگێ كوردستانێ ل سالا 2014 و ب ئەگەرێ راكرنا سوپایێ عێراقێ،هەموو دەڤەرێن كوردستانی یێن دەرڤەی ئیدارا هەرێما كوردستانێ گرتنە دەست و ژ هێرشێن تیرۆریستێن داعش ئاخ و خەلکێ دەڤەرێن كوردستانی پاراستن،لی گرووپەکێ ئێکەتیێ ل 16 ئۆکتۆبەرێ خیانەت کر و کەرکووک و چەندین دەڤەرێن دیتر رادەستی حوکمەتا عێراقێ کرن.
